“Demiraj ka firmosur tender miliona lekësh”, reagon Ministri i Brendshëm ndaj akuzave të Bollinos

Prej disa ditësh Carlo Bollino ka pasur disa akuza ndaj ministrave teknikë në qeverinë Rama, të propozuar nga PD.

Ditën e sotme në “Shqiptarja.com” kishte një shkrim ku thuhej se ministri Demiraj ka firmosur tendera miliona eurosh. Pas kësaj ka ardhur menjëherë reagimi i ministrit të Brendshëm, Dritan Demiraj.

“Vetëm Ministria e Brendshme, e drejtuar nga tekniku i PD, Dritan Demiraj, katër ditë pas zgjedhjeve parlamentare, pra në datën 29 qershor, ka shpallur 13 tendera. Ministri i Brendshëm Dritan Demiraj ka shpallur brenda një ditë 13 tendera me vlerë 257 milionë lekë të reja”, thuhej ndër të tjera në shkrim.

Më poshtë reagimi i plotë i ministrit Dritan Demiraj:

Ministri i Punëve të Brendshme Dritan Demiraj, referuar një lajmi të rreme të botuar në gazetën Shqiptarja.com dhe ripublikuar në media të tjera për firmosje tenderash, deklaron se nuk ka lidhje me asnjë procedure prokurimi në Ministrinë e Punëve të Brendshme.

Funksionet e Titullarit të Autoritetit Kontraktor i ushtron Sekretari i Përgjithshëm.

Ministri Demiraj kërkon përgënjeshtrimin e këtij lajmi të rremë. (E.K/SHUPLAKA)