Seria e radhës është zhvilluar nga anët e demokratëve. Në media ditën e sotme u shpërnda një lajm i cili thoshte se Endri Hasa i kishte fshirë mesazhet Gazment Bardhit në grupin parlamentar të PD-së në Whatsapp, ku njoftohej për mbledhjen e radhës të deputetëve.
Si administrator i grupit, në lajmin e shpërndarë prej disa mediave, thuhet se Hasa ka fshirë së pari mesazhin e Bardhit dhe pas kësaj u ka hequr të drejtën deputetëve të shkruajnë mesazhe dhe të komunikojnë mes tyre në grupin e përbashkët.
Megjithatë, Hasa ka bërë një reagim në Facebook lidhur me këtë situatë. Ai shprehet nëpërmjet një postimi se ky është një lajm i rremë, ku akuzon Bardhin si autor për interesa personale.
Më tej, shpjegon se Bardhit i është hequr administrimi grupit të Whatsapp duke qenë se nuk ka asnjë funksion as në PD dhe i është deleguar Flutura Açkës, për faktin se është ajo e cila ka drejtimin e Grupit Parlamentar të Partisë Demokratike, në zbatim të statutit.
Endri Hasa: Sot nëpër media ka qarkulluar një lajm i rremë i prodhuar nga deputeti Gazment Bardhi. Tashmë është e njohur nga të gjithë përpjekja e tij, që për interesa personale sulmon PD-në, institucionet dhe drejtuesit e saj.
Bardhi nuk është hequr nga asnjë grup Whatsapp-i të administruar nga Partia Demokratike.
Ai thjesht nuk është më administrator i grupit të Whatsapp-it, pasi tashmë ai nuk ka asnjë funksion, as në grupin parlamentar, as në PD.
Drejtimi i Grupit Parlamentar të Partisë Demokratike, në zbatim të statutit, i është deleguar znj. Flutura Açka, e cila koordinon prej ditës së enjte veprimtarinë e grupit.
Këto janë përpjekje qesharake të një njeriu që për interesat e tij personale kërkon të hedhë baltë dhe të dëmtojnë PD-në.
Koha kur PD-ja merrej zvarrë për interesa personale ka marrë fund, tani secili duhet të mbajë përgjegjësi për veprimet e veta dhe për rrugën që ka zgjedhur.
Asnjë flirt, i disa individëve me Berishën apo me Ramën, nuk do të arrijë më, të dëmtojë interesat e PD-së, demokratëve dhe shqiptarëve që presin një alternativë të re, luftën kundër korrupsionit dhe një partneritet të ngushtë me SHBA-në, Britaninë e Madhe dhe BE-në.
(Xh.H/FaxWeb.al)
