Gjykata e Maqedonisë ka vendosur që të mbajë në qeli Edmond Themelkon pas provave për falsifikimin e një sërë dokumenteve në zgjedhje.
Gjykata Themelore në Shkup pranoi kërkesën e Prokurorisë Speciale Publike dhe vendosi masën e paraburgimit 30 ditor për kryetarin e Bashkisë së Pustecit, në Shqipëri, Edmond Themelko.
Sipas “Top Channel” Themelko u akuzua për manipulimin e zgjedhjeve lokale të vitit 2013 në Maqedoni dhe është pjesë e dosjes “Titaniku”.
Themelko u arrestua në shkurtin e 2016-s për këtë çështje dhe më pas u la i lirë dhe u kthye në Shqipëri ku vazhdon të ushtrojë detyrën e kryebashkiakut në Pustec në qarkun e Korçës, zonë kjo me shumicë maqedonase.
Hetimet për çështjen në fjalë kanë nxjerrë se rreth 400 shtetas nga Pusteci kanë votuar në zgjedhjet e 2013-s në Maqedoni me dokumente të falsifikuara. (J.V/Shuplaka)
Discussion about this post