Përplasja ndërmjet Ambasadorit Lu dhe kryeprokurorit të përgjithshëm Adriatik Llalla është kthyer këto dy ditët e fundit në kryefjalën e medias dhe politikës. Palët akuzojnë njëra tjetrën për pengimin e Reformës në Drejtësi e për presione personale mes tyre, e paprecedentë kjo në historinë e shtetit tonë.
Së fundi pikëpyetja që ishte ngritur është fakti nëse Lu vepron në ‘’kokën e tij’’ apo ka mbështetjen e Departamentit Amerikan. Pikëpyetje kjo që ka marrë një përgjigje ditën e djeshme.
DASH shprehu të premten mbështetjen për ambasadorin e Shteteve të Bashkuara në Shqipëri, Donald Lu.
I pyetur nga Zëri i Amerikës nëse veprimet e ambasadorit Lu në Tiranë përfaqësojnë qëndrime personale dhe jo të Departamentit të Shtetit, zëdhënësi në detyrë Mark Toner u shpreh se “politika e Shteteve të Bashkuara në Shqipëri është të mbështesë anëtarësimin e vendit në Bashkimin Evropian dhe kryerjen e reformave të nevojshme për arritjen e këtij synimi. Kjo përfshin reformën në drejtësi, luftën kundër korrupsionit dhe krimit të organizuar si dhe luftën kundër ekstremizmit të dhunshëm’’.
Zëdhënësi i Departamentit të Shtetit tha të premten se “Ambasadori Lu dhe ekipi i tij kanë punuar në partneritet me autoritetet shqiptare dhe me shoqërinë civile për të realizuar politikat dhe synimet e Shteteve të Bashuara. Departamenti i Shtetit ka besim të plotë tek ambasada dhe ambasadori në Tiranë”, u shpreh zëdhënësi.
“Shtetet e Bashkuara i bëjnë thirrje me forcë gjithë partive të respektojnë shtetin ligjor dhe procesin demokratik. Shtetet e Bashkuara duan të shohin një Shqipëri të fortë dhe të integruar plotësisht në familjen Euro-Atlantike”,përfundon zëdhënësi i Departamentit të Shtetit Mark Toner. (E.K/SHUPLAKA)
Discussion about this post