Historiani Kastriot Dervishi ka komentuar shprehjen e njohur të Pjetër Arbnorit se “socialistët janë specialist dhe jo socialistë”. Pikërisht në një kohë që ish politikani u nderua me një bust në mjediset e Kuvendit, historiani i njohur shkruan në facebook, atë që fshihet pas shprehjes.
Sipas Dervishit e vërteta lidhet me një ngjarje që ndodhi në Bon të Gjermanisë në vitin 1992.
“Prej vitesh qarkullon një shprehje e vjetër e Pjetër Arbnorit se të majtët nuk ishin socialistë, por specialistë. E vërteta lidhet me një ndodhi në Bon, ish kryeqytetin e Gjermanisë në vitin 1992. Një grup deputetësh të Kuvendit Popullor me në krye kryetarin Pjetër Arbnori ishin për vizitë në Bon. Pas disa ditësh qëndrim në hotel, erdhi radha e pagesës së hotelit. Në pagesë përfshihej edhe pagesa e televizorit të dhomës, gjë të cilën deputetët nuk e dinin. Gjatë kohës së qëndrimit në hotel deputetët, të uritur për të parë programe pornografike, kishin rritur orët e pagesës televizive.
Në çastin kur duhej bërë pagesa te sporteli i hotelit, Pjetër Arbnori mëson çfarë kishin bërë deputetët dhe lëshon batutën se këta ishin specialistë, duke i ftuar të kryenin pagesat sipas kërkesave të gjermanëve. Kjo batutë pastaj është zgjatur e interpretuar në vite për gjëra të ndryshme”,- shprehet Dervishi.
Discussion about this post