Deputeti demokrat i Dibrës, Xhemal Gjunkshi ishte në Bulqizë pranë nxënësve të helmuar në shkollën e fshatit Shupenzë dhe familjarëve të tyre.
Deputeti Gjunkshi ka konstatuar mungesë të personelit mjekësor në Bulqizë për trajtimin e të shtruarve gjatë natës, ndërsa thotë se ende po vijnë nxënës me simptoma helmimi si këputje gjunjësh dhe marrje mendsh.
“Duke ndjekur situatën në spitalin e Bulqizës bashkë me Defrim Fikun kryetarin e PD Bulqizë, ku ende vijnë nxënës me simptoma helmimi, këputje gjunjësh dhe marrje mendësh. Është për të ardhur keq se situata në orët e mbrëmjes nuk është vlerësuar. Në spital janë mbi 25 të sëmurë dhe ende vijnë, por për të trajtuar të sëmurët është vetëm një mjeke dhe 2 infermjere. Sot dhe gjithë natën duhej që të ishin në gatishmëri jo vetëm mjekët e Bulqizës por edhe të Peshkopisë e të Matit. I bëjmë thirrje Ministres së Shëndetësisë të vlerësojë situatën që të mos agravojë më tepër. Të sjellë ekip mjekësor që t’iu japë ndihmën shëndetësore këtyre fëmijëve që po rikthehen nga 2 apo 3 herë. Falë zotit nuk kemi dëme në jetë njerëzore, tani na takon ne njerëzve të sakrifikojmë deri në përmirësimin e tyre”, ka thënë Xhemal Gjunkshi.
(B.H/Faxweb)
