Deputeti i Partisë Demokratike Luçiano Boçi reagon pas deklaratave të eurodeputetit Knut Fleckenstein, i cili i kërkoi opozitës të rikthehet në Parlanment.
Boçi realizon një listë me pyetje drejtuar eurodeputetit, në mënyrë që ky i fundit të arrijë kërkesat e opozitës, e cila prej më shumë se një muaj po proteston në çadrën e ngritur përballë kryeministrisë.
Në një intervistë për gazetën “Tema”, Fleckenstein tha se e respekton protestën e opozitës, por nuk është dakort me bojkotin e Parlamentit. Madje shtoi se nuk e kuptonte kërkesën për qeveri teknike.
“Unë i respektoj mendimet personale të atyre qytetarëve të cilët marrin pjesë në protesta paqësore me qëllim përkrahjen e bindjeve të tyre politike.
Jam shumë i lumtur që shikoj se Shqipëria është bërë një vend ku kjo është e mundur.
Liria e shprehjes është një nga të drejtat më të rëndësishme në demokracitë e Evropës dhe ne duhet të bëjmë më të mirën tonë për të respektuar dhe mbrojtur këtë të drejtë themelore të qytetarëve tanë.
E vetmja gjë për të cilën nuk jam dakord është bojkotimi i Parlamentit.
Deputetët janë zgjedhur për të përfaqësuar qytetarët brenda institucioneve shtetërore. Ata duhet që të kthehen në vendin e tyre të punës.”, tha Fleckenstein.
REAGIMI I BOÇIT
Që Z. Fleckeinstein ta kuptojë kërkesën e PD për qeveri teknike, mqs është shprehur që nuk e kupton, duhet t’i japë më parë përgjigje këtyre pyetjeve fare të thjeshta:
– Sa euro kushton një votë në landin e tij?
– Si blihen votat në Gjermani?
– Sa banda operojnë në landin e tij për llogari të partisë-qeveri?
– Cili është më “i forti” i lagjes së tij që mbledh vota?
– A i ka uruar ndonjëherë “shefi”, sipas humorit, “Suksese në jetë”?
– A fiton dot ai në zonën e tij nqs se i del përpara një “bos” droge a burgaxhi i sprovuar, apo killer famoz, se këtu jo e jo që nuk ka shanse?
– A ka gjasa të ketë kandidatë politikë me rekorde të thella kriminale në vendin e tij?
– A ka promovuar e përkrahur ai vetë, individë të tillë në politikë për Kryetarë Bashkish apo Deputetë?
– Sa ton hashash mbillen në Gjermani?
– Sa përqind merr policia nga aktiviteti i drogës në Gjermani?
– Sa miliarda euro nga ky aktivitet përdoren nga partitë politike për të marrë pushtet atje?
– Sa vendime merren “nën efekt” për interesa kriminale e plehrash në vendin e tij?
– Sa ministra janë ish punonjës të ish STAS-it, apo hetues për llogari të STAS-it?
Vetëm kaq i duhet. Shqipëria e siguroj, është vend përrallor, por nuk mund të përralliset!!!
Pas kësaj me shumë dëshirë do ia aprovoja këshillat e leksionet për demokracinë funksionale e parlamentare. (D.D/Shuplaka)
