Deputeti i Vlorës: Pse Turkish Airlines i fal Ramës një kompani ajrore, çfarë ka premtuar në këmbim?

Ditën e djeshme kryeministri Rama inauguroi nisjen e fluturimeve të ‘Air Albania’ që udhëtimin e parë e kreu nga Tirana drejt Stambollit.

Në deklaratën e tij inauguruese, kryeministri Rama ishte dhe shume entuziast, madje i vuri emrin “Lasgushi”, duke njoftuar se dy avionët e tjerë të ‘Air Albania’ do të quhen ‘Migjeni’ dhe deri në fund të vitit të ardhshëm “ ambicia është që të çojmë direkt nga Tirana në New York “Nolin”, – tha Rama.

Megjithatë ka ende dyshime të forta në lidhje me këtë kompani që mban ‘flamurin’ shqiptar. Deputeti i Partisë Demokratike për qarkun e Vlorës Agron Shehaj përmes një postimi në ‘Facebook’ thotë se “Air Albania me një kapital themeltar prej 800 euro, pa të punësuar, pa asete, pa sistem shitje biletash, është një mjet propagandistike për Ramën”.

Sipas tij Air Albania është një “branch” i Turkish Airlines, ndërsa shtron pyetjen se çfarë premtimi i ka bërë Rama kompanisë Turkish Airlines e cila i fal kryeministrit një ‘kompani ajrore’.

Shehaj thotë se kjo kompani është kamufluar si shqiptare por nuk dihet se kujt i përket.

Postimi i plotë:

Air Albania me një kapital themeltar prej 800 euro, pa të punësuar, pa asete, pa sistem shitje biletash, është një mjet propagandistike për Ramën.

Në të vërtetë Air Albania është një “branch” i Turkish Airlines dhe pyetja që lind është:
Pse Turkish Airlines i fal Ramës një kompani ajrore dhe çfarë ka premtuar Rama në këmbim? Aeroportin e Vlores?
Kush fshihet pas Sinan Idrizit dhe cili është roli i tij?
Në raport me të drejtat e fluturimit nga Shqipëria, do e bllokojnë autoritetet europiane këtë kompani të kamufluar si shqiptare por që në të vërtetë nuk është e qarte se e kujt është?

(B.H/Faxweb)