Pas heqjes së mandatit nga ana e KQZ-së, deputeti Shkëlqim Selami kishte lajmëruar se do ta ankimonte vendimin. Sipas tij vendimi i KQZ-së pas kërkesës së Prokurorisë është jo i drejtë.
Ndryshe nga sa u përfol ditët e para, do të jetë Gjykata Administrative ajo që do të marrë në shqyrtim ankesës e Selamit dhe jo Gjykata Kushtetuese.
Në një intervistë për ‘’Ora News’’, Selami ka njoftuar se në këtë Gjykatë ditën e nesërme avokati i tij do të paraqesë ankimimin.
Ai është shprehur se nuk paragjykon punën e KQZ-së apo organeve të drejtësisë, por është detyrimi i tij moral që ta ankimojë këtë vendim.
Në dokumentet që dispononte Prokuroria deputeti Shkëlqim Selami është hetuar dhe dënuar nën akuzën e trafikimit të qënieve njerëzore. Në facsimile, prokurori Petrit Fusha që ka hetuar rastin e tij, ka renditur faktet se Selami është arrestuar më 31/08/2006 dhe ky urdhër arresti i ekzekutuar në 2006 është lëshuar në 03/10/1994 si masë sigurie personale “arrest me burg në mungesë”.
Në kopjen e siguruar të vendimit, rezulton se tre gjyqtarët italian Rodoslo Boseli, Domenico Toni dhe Katia Pinto e kanë gjykuar Selamin në mungesë së bashku me shtatë persona të tjerë, ndër ta pesë shqiptarë dhe dy Italianë.
Në dokument rezulton se të dhënat për hetimin e arrestimin e Selamit prokurori Petrit Fusha i ka siguruar nga zyra ndërlidhëse e policisë italiane që me shkresën 100 B -302-2 Pro dt.19/12/2016 i sjell palës shqiptare informacion për masën e sigurisë të vitit 1994 ndaj Selamit dhe arrestimin e këtij të fundit në Gusht të 2006.
KQZ votoi në mënyrë unanime për heqjen e mandatit të deputetit Selami.
(E.K/SHUPLAKA)
