Deputetja e zgjedhur për Vlorën nga radhët e PD-së, Nada Meçorapaj ka një propozim për Këshillin Bashkiak të këtij qyteti pas tragjedisë ku humbën jetën tre të rinj në plazhin e Zvërnecit.
Sipas Mecorapajt, i riu nga Tetova Benjamin Ferati duhet të marrë titullin “Mirënjohja e qytetit të Vlorës” për shkak se humbi jetën duke u përpjekur të shpëtonte nga dallgët dy vajza që nuk i njihte më parë.
“A duhet të jetë shqiptari nga Tetova, Benjamin Ferati, ‘Mirënjohja e Qytetit’ të Vlorës?
Unë mendoj se po, dhe jam e sigurt se të njëjtën gjë mendoni të gjithë. Për këtë, duke besuar edhe te mbështetja juaj e njëzëshme qytetare, kam vendosur që, si nënë, si motër, si vlonjate dhe si deputete e Vlorës, t’i propozoj Këshillit Bashkiak, që t’i akordojë titullin ‘Mirënjohja e qytetit’, shqiptarit të mirë dhe të ndjerë, Benjamin Ferati.
E bëj këtë ftesë edhe si ish-këshilltare, dhe e di se të gjithë kolegët e mi, pavarësisht ngjyrës së flamurit partiak dhe bindjeve do të jenë mbëshetës.
Le ta nderojmë Vlorën me një gjest për aktin e madh humanist të Benjaminit!”, shkruan Mecorapaj. (D.D/Shuplaka)
Discussion about this post