Dy ditë përpara zgjedhjeve që do të mbahen për kryetarin e Akademisë së Shkencave, Kryetarja e Komisionit të Medias, deputetja e dalë nga radhët PD-së Fatjona Dhimitri iu ka bërë thirrje akademikëve që të mos përfshihen në këtë proces.
Dhimitri theksoi se Shkencën nuk duhet ta drejtojnë politikanët, ndërsa i bëri thirrje Skënder Gjinushit të tërhiqet nga gara.
“U bëj thirrje akademikëve të mos përfshihen në procese të parregullta ligjore që kompromentojnë të ardhmen e Akademisë së Shkencave dhe e vendosin ligjëvënësin para faktit të kryer. Nuk ka asnjë nxitim për mbajtjen e zgjedhjeve në 24 maj, tani që ndërtimi i ligjit për Akademinë e Shkencave ka hyrë në proces”- tha ajo.
“Kokëfortësia, mungesa e transparencës e një grupi apo edhe një individi vetëm e dëmton akademinë dhe shkencën shqiptare. U bëj thirrje akademikëve të mos përfshihen në procese që bien në kundërshtim me ligjin. Mendimi shkencor nuk mund të jetë pjesë e skemës politike. Zoti Gjinushi, ish-kryetar partie që ka dhënë dorëheqje 4 ditë më parë, ish kryetar Kuvendi dhe ish ministër në diktaturë, po pse edhe shkencën ne politikanët do ta drejtojmë? Zoti Gjinushi tërhiquni nga zgjedhjet! Mos e censuroni kornizën e mendimit shkencor në vend”.
Zgjedhjet në Akademinë e Shkencave janë kundërshtuar hapur nga Artan Fuga, i cili ka dërguar dhe letra publike në drejtim të institucioneve më të larta të vendit. Po ashtu kundër zgjedhjeve farsë në Akademi është pozicionuar dhe deputetja e opozitës Rudina Hajdari.
