Kategoria Superiore këtë javë do të ketë një ndeshje shumë të rëndësishme siç është derbi i kryeqytetit. Në lojë do të jenë tre pikët edhe pse skuadra e Partizanit është më e avantazhuara.
Mbrojtësi i Partizanit, Gëzim Krasniqi, ka kërkuar nga shokët e tij që Tirana të mos nënvlerësohet në asnjë mënyrë pavarësisht situatës së vështirë që po kalon. Në konferencën për shtyp në kuadër të derbit, ai kujtoi ndeshjen e fundit që bardheblutë kanë fituar para 3 vitesh me gol të Gilbertos, duke thënë se në atë kohë Tirana po kalonte gjithashtu një situatë shumë të vështirë.
Për derbin
“Pothuajse jemi në fund të këtij sezoni, çdo ndeshje e dimë që është një finale, por derbi ka një rëndësi më të madhe, pasi fitoren e dëshirojnë më shumë se kurrë edhe tifozët. Jemi të përgatitur për këtë përballje dhe shpresojmë se do ta kalojmë me sukses.
Në këtë moment për ne më e rëndësishme është të fitojmë trofeun , por duhet të theksoj se në përballjet derbi vitet e fundit rezultatet kanë folur në favorin tonë.
Ndaj Tiranës mendojmë vetëm fitoren , pasi nuk na lejohet asnjë rezultat tjetër sepse do të na dëmtonte në objektivat që kemi, ndaj them që vetëm fitorja do të na mbajë në garën për titull.
Për mendimin tim kjo ndeshje do të ketë vlerësimin tonë maksimal, pavarësisht pozitave në të cilat gjendet kundërshtari. Dua të kujtoj se në të njëjtat pozita Tirana ka qenë edhe para 3 vitesh dhe ne e humbëm derbin , ndaj pohoj se i kemi kushtuar rëndësinë maksimale këtij ballafaqimi. Ne luajmë për objektivin madhor fitimin e titullit ndërsa Tirana për mbijetesë.
Ta fitojmë këtë ndeshje për klubin dhe tifozët tanë të mrekullueshëm të cilët do të na mbështesin siç edhe vetëm ata dinë ta bëjnë në çdo ndeshje.”
Për garën e titullit
“Ne duhet thjesht të bëjmë detyrën tonë nuk na intereson fare se çfarë do të bëjnë Kukësi dhe Skënderbeu. Për Partizanin dy ndeshjet e radhës do të jetë përcaktuese për titullin.”
Discussion about this post