Ndeshja më e rëndësishme e kësaj jave në futboll, derbi Tirana-Partizani u shty për sot, pas ndërprerjes së energjisë elektrike në minutën e 63-të.
Dhjetë mijë tifozët e pranishëm në stadiumin “Selman Stermasi”, qëndruan në errësirë për më shumë se 30 minuta.
Përveç stadiumit, dritat iu ndërprenë edhe një pjese të një zone përreth.
Operatori i shpërndarjes së energjisë elektrike (OSHEE) më shumë e justifikoi ndërprerjen e energjisë sesa mori përgjegjësi mbi të.
Në orën 20:30 OSHEE deklaroi që nuk dinte gjë për ndeshjen. “Drejtuesit e stadiumit s’na njoftuan për ndeshjen”, shkruan OSHEE.
Sipas këtij autoriteti, heqja e nënstacionit elektrik te 15-katëshi ka sjellë mbingarkesë në rrjet, çka ka sjellë edhe ndërprerjen e energjisë elektrike.
Presidenti i Partizanit, Gazmend Demi shprehet mjaft ashpër për këtë ngjarje, saqë ka kërkuar marrjen e ndeshjes në tavolinë. Ai e cilëson si dështim të organizatorëve për përmbushjen e kushteve të një ndeshjeje.
“Partizani ishte më i fortë. Për situatën e krijuar më vjen keq që ndodh kështu. Kjo s’ka logjikë. Fati i keq që është tek Tirana. Mos ketë një organizim, një gjenerator, një linjë të dytë. Në shtëpi po mbajmë linja të dyta. Për mua s’duhet të ketë ndeshje, duhet të marrim ndeshjen në tavolinë. Po ka FSHF, po ska të vazhdojnë”, shprehet Demi.
Ndeshja e ndërprerë do të riluhet sot në orën 14:00 dhe do të nisë në minutën e 63-të, aty ku u ndërpre.
Video:
