Dervishaj në Pukë, apel qytetarëve: Përdorni zinxhirë!

Në këtë të ftohtë polar që ka kapluar vendin, Ministri i Transporteve Sokol Dervishaj po njek situatën në rrugën Bushat-Pukë.

Ministri njofton se në këtë aks rrugor po punohet intensivisht në mënyrë që të mos bllokohet qarkullimi dhe të shmangen incidentet. Sipas tij, ky aks rrugor nuk ka asnjë problem. Megjithatë ai u sugjeron drejtuesve të automjeteve që të përdorin zinxhirë pasi është e vetmja mënyrë për të kaluar. 

Ndërkohë, Bashkia e Pukës informon se është angazhuar maksimalisht për të mbajtur nën kontroll situatën dhe po punon me një mjet fadromë për mbajtjen hapur të rrugëve në lagjet periferike.

Gjithashtu, bashkia ka vënë në dispozicion dhe një borëpastruese nga Drejtoria e Emergjencave Civile, e cila po punon për mbajtjen hapur dhe pastrimin e rrugëve brenda qytetit. 

Megjithatë, fshatrat në Njësinë Administrave Gjegjan, Rrapë, Luf Qerret dhe Qelëz janë të bllokuara. Ndërkohë pa energji elektrike vazhdojnë të jenë fshatrat e Njësisë Administrative Qelëz, si edhe fshatrat Kimëz, Dom, Rras Kuzhnen, Rryp, Prozhëm, Blinisht, Kabash, Vrrith, Qerret. (D.D/Shuplaka)