“Dështoi mjerisht”, Rexhep Qosja zbulon se kush fshihet pas mospranimit në Interpol të Kosovës

Akademiku Rexhep Qosja ka komentuar me tone të ashpra mospranimin e Kosovës në organizatën ndërkombëtare të Interpol.

Qosja përmes një reagimi në Facebook, shkruan se është vetë shteti i Kosovës fajtor për këtë dështim dhe jo Serbia, siç e fajësuan shumë të tjerë.

Akademiku thekson se politika e Jashtme është shprehje e politikës së brendshme.

“S’deshën të pohojnë se fajtore për këtë dështim të Kosovës është vetë Kosova! Politika e jashtme e çdo shteti është shprehje e politikës së brendshme. Politika e jashtme e çdo shteti është fryt i mrekullueshëm apo plotësisht i dështuar i politikës së brendshme“, shkruan Qosja.

Postimi i Rexhep Qosjes

Mjerisht Kosova dështoi edhe për të tretën herë për t’u bërë anëtare e organizëtës ndërkombëtare të Interpolit.

Të gjithë ata njerëz të politikës, të pozitës e të opozitës dhe të gjithë ata analistë që folën për këtë dështim e fajësuan Serbinë!

Dhe duke e fajësuar ata në të vërtetë e ngritën, e madhëruan, e lavdëruan politikën e saj. Serbinë e vogël, Serbinë e shpërfillur prej shumë shteteve në botë sot, ata e bënë shumë të çmuar, sepse e bënë shumë ndikuese e shumë efikase politikën e saj të jashtme!

S’deshën të pohojnë se fajtore për këtë dështim të Kosovës është vetë Kosova!

Politika e jashtme e çdo shteti është shprehje e politikës së brendshme. Politika e jashtme e çdo shteti është fryt i mrekullueshëm apo plotësisht i dështuar i politikës së brendshme.

E politika e brendshme e Kosovës, e komprometuar prej korrupsionit, nepotizmit, pushtimit të shumicës së medieve prej pushtetit e pushtetarëve, të privilegjeve të shumëllojshme të pushtetarëve, të pasurimit marramendës të politikanëve duke qenë në pozita politike, të privatizimit të shtetit pashmangshëm e ka komprometuar edhe politikën e jashtme të Kosovës