Për herë të dytë brenda tri viteve dështon arrestimi i biznesmenit Bardhok Pllanaj. Pasi i shpëtoi aksionit të Policisë në Tiranë në vitin 2014, biznesmeni i dyshuar për trafik droge ka arritur t’u shpëtojë edhe një herë tjetër prangave të policisë.
Kjo ka ndodhur pak ditë më parë në kohën kur policia me urdhër të Prokurorisë së Krimeve të Rënda vendosi në pranga katër anëtarë të dyshuar të grupit ku bënte pjesë edhe biznesmeni Pllanaj. Gjykata e Krimeve të Rënda me kërkesë të Prokurorisë ka caktuar masat e sigurisë burg pa afat për shtetasit Andrea (Renato) Çaushi, Andrea Mita, Kasem Piluri dhe Altin Rramolli.
Ata janë akuzuar për trafikim ndërkombëtar të narkotikëve në bashkëpunim më shumë se një herë. Por ndërsa këta katër persona ranë në pranga, edhe pse me vështirësi, mendohet se Pllanaj së bashku me pesë persona të tjerë, që kanë qenë pjesë e grupit, kanë arritur të shpëtojnë. Prokuroria dhe Shërbimi për Çështjet e Brendshme dhe Ankesat në Ministrinë e Brendshme kanë dyshime se aksioni është dekonspiruar, shkruan Panorama.
Dyshimet janë se lajmi për arrestimet që ishin autorizuar nga gjykata, ka shkuar para se policia të vepronte në veshin e vetë biznesmenëve në kërkim apo tek të afërmit e tyre. Pllanaj i shpëtoi arrestimit edhe në ditët e para të tetorit 2014 pas një aksioni të antidrogës së Policisë së kryeqytetit. Forcat e Policisë ndaluan një makinë ku ndodhej edhe deputeti Frroku në zonën e Kamzës, me dyshimet se biznesmeni ndodhej në atë mjet. Por asnjëherë nuk u arrit të bëhej kontroll në makinën në fjalë dhe të konfirmohej nëse biznesmeni kishte qenë vërtet aty apo jo.
(M.D/Shuplaka)
Discussion about this post