Kryeqyteti është tronditur mbremjen e sotme nga një tjetër ngjarje e rëndë. Në një nga zonat më të populluara të Tiranës, në zonën e njohur si Astiri, në një lokal janë dëgjuar të shtëna me armë.
Paraprakisht raportohet nga gazetarja e Fax News Denisa Mamhmutaj, se një person ka mbetur viktimë. Viktima ka qenë në një lokal, është thirrur nga disa persona dhe më pas është qëlluar.
Ndërkohë policia ka vendosur perimetrin e sigurisë në zonë. Ngjarja ka ndodhur vetëm pak minuta më parë.
Tiranë /Informacion paraprak
Rreth orës 20.45, në Astir, në një rrugicë, në afërsi të një lokali, në rrethana ende të paqarta është plagosur me armë zjarri shtetasi V.T, rreth 28 vjeç, i cili më pas ka gjetur vdekjen.
Menjëherë në vendngjarje kanë shkuar shërbimet e Policisë, të cilat kanë bërë rrethimin e zonës në një perimetër të gjerë.
Janë ngritur pika kontrolli në të gjitha akset rrugore si dhe vijon puna nga grupi hetimor për sqarimin e rrethanave të ngjarjes, grumbullimin dhe fiksimin e çdo prove që do çojë në zbardhjen e ngjarjes, identifikimin dhe arrestimin e autorëve.
(M.Q/Faxweb.al)
