Ish-deputeti socialist dhe njëherazi nënkryetari i Qarkut të Lezhës, Agustin Marku, ra pre e dhunimit ditën e djeshme, teksa ishte duke dalë i vetëm nga ambientet e një lokali.
Një ditë më pas, policia jep detaje lidhur me ngjarjen e ndodhur në lagjen “Skënderbeg” të Lezhës. Mësohet se kanë qenë dy të rinj, të moshave 21 dhe 18 vjeç, ata që kanë dhunuar befasisht ish-deputetin e PS-në në momentin që ai ishte duke dalë nga lokali.
Burime të policisë shprehen se dhunimi ishte pasojë e një konflikti të çastit, ndërkohë që Agustin Marku ndodhet jashtë rrezikut për jetën.
Nënkryetari i Qarkut të Lezhës u godit një ditë më parë me mjete të forta. Autorët e dhunimit janë shpallur në kërkim nga policia.
“Më datë 20.02.2017, u referuan materialet hetimore në Prokurorinë e Rrethit Gjyqësor Lezhë dhe punohet për kapjen e shtetasve: K.N. 21 vjeç dhe S.N. 18 vjeç, të dy banues në Lezhë. Këta 2 shtetas dyshohet se rreth orës 13:30, në lagjen “Skënderbeg” të qytetit Lezhë, para një lokali, për motive të dobëta kanë goditur me mjete të forta, shtetasin A.M. 54 vjeç, banues në Lezhë, me detyrë N/Kryetar i Këshillit të Qarkut Lezhë.
Pas ndihmës së nevojshme mjekësore në Spitalin Rajonal Lezhë, shtetasi A.M. ndodhet jashtë rrezikut për jetën. Materialet procedurale për dy vëllezërit u referuan Prokurorisë së Rrethit Gjyqësor Lezhë për veprat penale “Kanosja”, “Dëmtime të tjera me dashje” dhe “Goditje për shkak të detyrës.”, bëhet me dije në njoftimin e policisë.
(XH.A/SHUPLAKA)
Discussion about this post