Arrestimi i gjyqtarit Shkëlqim Miri pa pritur caktimin e masës së sigurisë nga gjykata është bërë për shkak se ekzistonte dyshimi se ai mund të arratisej jashtë vendit.
Kishte lindur ky dyshim pasi dy ditë para arrestimit të tij, kushëriri i tij, Kujtim Miri, ishte thirrur në prokurori.
Sipas “Panorama” atë ditë Kujtim Miri nuk ishte marrë në pyetje nga Prokuroria por dyshohet se e ka informuar gjyqtarin për këtë fakt ( që e kishin thirrur në Prokurori).
Mësohet se më 7 nëntor 2017 është thirrur për të dhënë shpjegime në Prokurorinë për Krimet e Rënda Kujtim Miri.
VËZHGIMI I KUJTIM MIRIT:
Pasi ka lënë ambientet e Prokurorisë, ai ka udhëtuar drejt Fushë-Krujës. Por në të njëjtën ditë, sipas Prokurorisë, ai ka takuar gjyqtarin Shkëlqim Miri.
“Fillimisht, sipas vëzhgimit që i është bërë, Kujtim Miri ka lëvizur në drejtim të Rinasit e pasdite, në orën 19:40, po më datë 7 nëntor 2017.
Ulet në një barkafe në rrugën ‘Islam Alla’, ku është dhe shtëpia e gjyqtarit, dhe aty takohet me këtë të fundit.
Kujtim Miri, mbajtës i numrit të telefonit 0682088xxx, si dhe Shkëlqim Miri, mbajtës i telefonit 0692069xxx, janë përgjuar mes tyre teksa kanë folur në datat 23, 24, 25 dhe 26 maj 2017, si dhe në datat 4, 5, dhe 8 qershor 2017, që korrespondon me një ditë pas shpalljes së vendimit në Apel, vendim i cili është shpallur më 7 qershor 2017″, thuhet në dosjen e Prokurorisë.
(J.V/Faxweb)
