Detaje të reja janë zbardhur lidhur me grabitjen e shënuar në fshatin Bulgarec të Korçës gjatë së hënës. Tre persona të maskuar e të armatosur mundën të vidhnin 7 milionë lekë të vjetra dhe disa dokumente nga kasaforta e dyqanit në pronësi të një ndër biznesmenëve më të fuqishëm të Korçës, Luan Larti.
Ngjarja ndodhi disa orë pas vdekjes së babait të biznesmenit, në kohën kur familja kishte hapur dyert e mortit.
Burime të Policisë Korçë bëjnë të ditur se tre autorët e grabitjes kanë hyrë brenda biznesit të 5-vjeçarit Larti pasi i kanë lidhur duart rojes së objektit. Ata kanë thyer derën e njërës prej zyrave të firmës dhe kanë vjedhur një kasafortë.
Njoftimi i policisë
(Në vijim të informacionit paraprak)
Më datë 19.12.2016, rreth orës 01:00, në aksin rrugor Korçë-Maliq, në afërsi të fshatit Bulgarec, në një firmë private pronë e shtetasit L.L, 51 vjeç, kanë hyrë tre shtetas të maskuar, të cilët dyshohet të kenë qenë edhe të armatosur.
Nga veprimet proceduriale të kryera dhe deklarimet e marra, rezulton se këta shtetas në bashkëpunim mes tyre, pasi i kanë lidhur duart rojes së objektit, kanë thyer derën e njërës prej zyrave të firmës dhe kanë vjedhur një kasafortë, brenda së cilës ndodheshin një sasi lekësh.Nga ana e Policisë po punohet për identifikimin, kapjen e autorëve si edhe dokumentimin e plotë të ngjarjes.
Materialet i kaluan Prokurorisë së Rrethit Gjyqësor Korçë për veprën penale : “Vjedhja me dhunë, e kryer në bashkëpunim” parashikuar nga nenet 139 e 25 të Kodit Penal.
(XH.A/SHUPLAKA)
Discussion about this post