Fax News raporton se ka qenë një hetim disa mujor i policisë së Fierit që ka çuar në zbulimin e kufomës së dekompozuar në një kanal në fshatin Daullas të Bashkisë Fier. Mësohet se hetimet janë kryer për zbulimin e vendndodhjes së personave që janë denoncuar nga familjarët si të zhdukur. Në këtë rast, bazuar në informacione operative, ka pasur dyshime se një person i denoncuar nga familjarët si i zhdukur në muajin qershor, mund të ishte vrarë.
Mësohet se falë hetimeve speciale janë siguruar të dhëna për vendodhjen e mundshme të eshtrave të një personi të zhdukur rreth 9 muaj më parë, që mendohet të jetë i seksit mashkull, rreth 34-35 vjeç. Gjithashtu, mësohet se gjatë dy ditëve të fundit janë shoqëruar persona që mund të kenë dijeni mbi ngjarjen si edhe një person që mund të jetë i përfshirë.
Pasdite e sotme, në fshatin Daullas të Fierit, policia gjeti kufomën e dekompozuar të një personi. Eshtrat gjendeshin të mbështjella me një batanije. Në kanal, aty pranë u gjet edhe një valixhe. Nga keqyrja paraprake dyshohet se viktima është qelluar me mjete prerëse dhe trupi mund të jetë gjymtuar. Pritet kryerja e ekspertizës mjeko ligjore dhe e ADN për të konkluduar zyrtarisht në identitetin e viktimës. Policia në bashkëpunim me prokurorinë janë duke punuar për dokumentimin e plotë të ngjarjes.
(M.Q/Faxweb)
