Një ngjarje e rëndë, dhe ende kontradiktore ka ndodhur rreth orës 09:20 të mëngjesit të sotëm në në Krastë të Elbasanit, ku tre automjete janë përfshirë në një aksident.
Burime bëjnë me dije se një makinë, e cila ka qenë në ndjekje nga ana e policisë, ka përplasur postobllokun e vendosur në zonën e Krastës, duke lënë të plagosur të paktën katër persona, mes tyre dhe një punonjës policie.
Efektivi i plagosur Eugen Abdurrazaku ndodhet në reanimacionin e spitalit të Elbasanit, në gjendje të rëndë për jetën, ku pritet ti nënshtrohet dhe disa ndërhyrjeve kirurgjikale.
Nuk dihet ende nëse ai është plagosur si pasojë e përplasjes së makinave, apo prej plumbave që janë gjuajtur në drejtim të tyre, pasi fillimisht u raportuan edhe për të shtëna.
Burime bëjnë me dije se personi të cilit i është vendosur pas policia ka qenë Almiron Shehu, nga Gjirokastra, i cili ka pasur precedent penalë në fushën e trafikimit të klandestinëve.
Shehu nuk i ka ndaluar partullave të policisë që ishin ngritur më parë dhe në zonën e Pogradecit dhe Korçës, ndërsa mbetet e paqartë nëse është mes personave që kanë mbetur të plagosur në aksident.
Nga ana tjetër Policia e Gjirokastrës ka nisur një kontroll në banesën e të atit të tij e cila ndodhet në lagjen Manalat të Gjirokastrës.
I ati i tij ka disa dyqane mishi në qytet, raporton gazetarja e Fax News Ervina Shehaj.
Në aksident është përfshirë dhe një autoshkollë, e cila dyshohet se ka qenë rastësisht aty dhe nuk ka pasur lidhje me ngjarjen.
Gazetarja e Fax Neës Entela Duka raporton se në vendin e ngjarjes ndodhet dhe prokuror Ritvan Sukaj. Në njërin prej bagazheve të makinave që ndodhen në vendin e ngjarjes janë gjetur disa targa fallso.
