Detaje/ Vrasja brenda marketit në Kamëz, gruaja mori thikën dhe u përpoq të ndalonte grabitësit

Në lidhje me vrasjen dhe plagosjen brenda marketit në Kamëz kanë dalë detaje të reja, kronologjia me të cilën ka ndodhur ngjarja.

Brenda në market ndodhej vetëm gruaja dhe djali 6 vjeçar. Sapo autorët janë futur brenda në market Merita (gruaja e cila ka mbetur e plagosur) ka marrë një thikë që ndodhej në tavolinë dhe ka tentuar të vetëmbrohet. Asnjëri nga autorët s’ka mbetur i lënduar.

Në momentin që ka kërkuar ndihmë në market është futur burri i saj Agimi dhe njërin nga autorët e ka kapur nga mbrapa. Në atë moment personi tjetër i cili kishte pistoletën ka qëlluar.

Nga ana tjetër Policia njofton se: Janë shoqëruar deri tani 13 persona për tu marrë në pyetje në lidhje me ngjarjen. Vijon puna për fiksimin e çdo prove materiale të vlefshme për zbardhjen e ngjarjes. Policia e Tiranës vë në dispozicion 500.000 lekë për cilindo që jep informacion të vlefshëm.

Për çdo informacion që do shërbejë për identifikimin e autorëve të kësaj ngjarje të telefonojnë në numrin 069 41 10 299, duke garantuar anonimatin.

(E.K/FAXWEB.AL)