Të tjera detaje kanë dalë në dritë nga vrasja e 26-vjeçarit Marjo Ismaili në Kavajë pak orë më parë. Sipas burimeve të “FaxNews”, ngjarja ka ndodhur tek lokali poshtë pallatit të Marsida Qatjas.
Kjo e fundit nuk është një emër i panjohur për publikun sepse në fillim të muajit tetor në hyrjen e saj u vra Dritan Haxholli dhe u plagos efektivi Bledar Toçi.
Sipas informacioneve, 26-vjeçari dhe autori, Xhevdet Lecini kanë qenë bashkë në lokal duke pirë alkool që nga ora 11 e paradites. Për shkak të pijes, ata kanë nisur të debatojnë për motive banale dhe më pas situata ka agravuar deri në përdorimin e armës.
Autori 60-vjeçar është shoqëruar menjëherë në ambientet e policisë, ndërsa gjatë marrjes së dëshmisë ai është shprehur se gjithçka ndodhi për shkak të pijes.
“Kemi qenë të pirë, ishim prej orës 11:00 në tavolinë. Nuk e di si ndodhi, u errësova dhe e vrava”, mësohet se ka thënë Lecini. 60-vjeçari banon në katin e tretë të pallatit, ndërsa është edhe pronar i lokalit ku ndodhi vrasja.
(M. I./ Faxweb.al)
