Kryeministri Edi Rama pak orë më parë publikoi një tjetër spot të PS-së për fushatën zgjedhore, kun ë qendër të tij ishte sulmuesi i Kombëtares Armando Sadiku. Mirëpo një detaj që nuk u vu re nga mediat, ishte fakti që nëpërmej këtij spoti, vazhdon kulti i individit.
Pasi Sadiku shprehet se dy golat e tij në ndeshjen kundër Izraelit ia kushton Edi Ramës, në fund spoti mbyllet me fjalët: Voto Edi Ramën, voto Partinë Socialiste.
Madje Sadiku shprehet në spot se është i bindur se trajner si Rama vjen një herë në 50 vjet.
“Që kur Edi Rama është bërë kryeministër i Shqipërisë, kthehem në Shqipëri me shumë dëshirë sepse shikoj një Shqipëri më të bukur. Edi Rama ka bërë aq shumë për futbollin sa askush nuk e bëri në 25 vitet e fundit. Unë ia dedikoj të dy golat e mi kundër Izraelit numrit 2 në fletën e votimit, Edi Ramës dhe jam i bindur se trajner si Edi Rama i vjen Shqipërisë një herë në 50 vjet.”, shprehet Armando Sadiku.
Kështu në Shqipëri, kryetari i partisë vazhdon të luajë rolin më të rëndësishëm në fushatë, sesa e gjithë baza e partisë.
Kujtojmë se kryeministri Edi Rama të njëjtën gjë ka bërë edhe me spotet e tjera, ku vetë Partia Socialiste është më e zbehtë se sa kryeministri i cili promovohet vazhdimisht. Javën e kaluar, Rama publikoi një video ku shihej në rolin e një polici që po vendoste gjobat. Sërish kulti i individit. (D.D/Shuplaka)
