Mediat ndërkombëtare kanë raportuar se dhëndri i presidenti të SHBA-ve, Jared Kushner do të merret në pyetje nga një komision i Senatit amerikan për lidhjet e dyshuara mes stafit të Trump dhe Moskës.
Ai njihet për kontributin që ka dhënë gjatë fushatë presidenciale të Trump dhe është një nga bashkëpunëtorët e tij.
Burime nga Shtëpia e Bardhë kanë bërë të ditur se Kushner ka shprehur vetë vullnetin e tij për të folur përpara Komisionit për Shërbimet e Inteligjencës, që po heton ndërhyrjen e supozuar të Rusisë në zgjedhjet e vitit të kaluar.
Komisioni kërkon ta marrë në pyetje në lidhje me dy takime që ai dyshohet të ketë zhvilluar me zyrtarë rusë, raporton “New York Times”.
Komisioni i Shërbimeve të Inteligjencës dyshon se hakerimi rus gjatë zgjedhjeve presidenciale ka pasur si qëllim të ndihmojë zotin Trump në fitoren kundër Hillary Clinton.
Nga ana e saj Rusia i ka mohuar këto akuza dhe vetë presidenti Trump i ka cilësuar si “lajme të rreme”. Por aktualisht janë dy komisione hetimore parlamentare që po hetojnë dyshimet në fjalë, si dhe një hetim i FBI-së.
Administrata Trump është e preokupuar nga raportet e inteligjencës për akuza të përzierjes së Rusisë në fushatën zgjedhore dhe hetimet e agjencisë FBI ndaj ndihmësve të zotit Trump.
Pesë komitete të ndryshme të Kongresit të Shteteve të Bashkuara, po ashtu, po zhvillojnë hetime lidhur me Rusinë.
(M.D/ Shuplaka)
