Rektori i Universitetit të Tiranës, Mynyr Koni, ka treguar arsyet e përplasjes mes tij dhe Bordit të Administrimit të UT-së. Koni ka folur dhe për prishjen e miqësisë së vjetër mes tij dhe ish-rektorit Dhori Kule.
Në një intervistë për “Panorama”, Koni ka thënë se Kule kërkon që të ndryshohet rektori në UT, dhe se sipas tij, tani e ka kuptuar sepse është mbështetur nga Kule në fushatë. Sipas Konit e gjitha ka qenë ‘luftë’ për pushtet.
“Dhori Kule kërkon që ku të jetë ai, të jetë dhe pozicioni. I bie që sipas gjykimit të tij, rektori të jetë tashmë te Fakulteti Ekonomik.
Dhori Kule më ka mbështetur në procesin zgjedhor, është një fakt që s’e mohoj kurrë, por tashmë duket e qartë arsyeja përse më paska mbështetur.
Sa u përket numrave, unë kam fituar mbi 270 vota më tepër. Po ia fal ato 100 vota, përsëri shpallem fitues. Unë vlerësoj dhe respektoj në maksimum kolegët e mi, që më kanë votuar dhe do luftoj deri në fund për të mbrojtur stafin akademik dhe studentët e Universitetit të Tiranës.
Ata gjithashtu kanë tentuar të pengojnë funksionimin e strukturës së auditit. Edhe Ministria e Financës ka marrë përsipër të interpretojë Ligjin e Arsimit sipas dëshirës së Dhori Kules. Kjo tregon suportin dhe lidhjet përkatëse të tij.”,-ka thënë Koni.
(F.G/Faxweb.al)
Discussion about this post