Gjatë ditës së sotme, incidenti i parë i përdorimit të dhunës në fushatë ka tronditur edhe njëherë opinionin publik si në vitet e shkuara. I dhunuari është Orgest Grembi, një anëtar i Lëvizjes Socialiste për Integrim. Babai i Orgestit, Kujtim Grembi rrëfen për herë të parë se si ndodhi ngjarja dhe se si ia dhunuan djalin përpara syve.
“Isha me ato punë siç ka fshati, po vadisnim, nja dy çuna ishin në hije të pemëve rrëzë lumit. Vijnë atje dhe më ngacmojnë çunin, ‘për kë do votosh ti? Për LSI? Të q.. kurvën, të bëjmë këtë e atë.’
Ishin me dy të tjerë ata, kur u çuan ata dhe më goditën çunin me levë. I çova në polici, i kam edhe kushërinj. Turp të kenë ata. Djali është anëtar i LSI-së, ka qejf ai, është qejfli, bredh. Ça pune ka ai? Unë mund të mos votoj për çunin, çuni ka zgjedh rrugën e tij, ç’punë ka ai. Ai që më goditi mua është kryetari i partisë, i PS-së”, tregon Kujtim Grembi.
I pari që e denoncoi rastin ishte kreu i LSI-së Petrit Vasili, i cili tha që Agim Grembi, një anëtar i PS-së me precedent penal, ka dhunuar një mbështetës të LSI-së. Ndërsa më vonë, ishte Erisa Xhixho ajo që zbuloi identitetin e të dhunuarit, i cili i përkiste të njëjtit fis me autorin. Xhixho ka publikuar edhe një fotografi të të dhunuarit.
Rasti i të riut nga Fieri, është incidenti i parë i shënuar në këtë fushatë, ku është përdorur dhuna, faktuar edhe me foto. Ndërsa më parë, gjatë takimeve elektorale ka patur protesta si ajo e tipit të tre protestuesve në takimin elektoral të Ramës në Shkodër, të cilët nuk lënduan njeri. (D.D/Shuplaka)
Discussion about this post