“Mos vini dorë mbi gazetarët, pa raportimin e tyre do të shihnit çdo natë ‘bla, bla, bla’– kështu është shprehur gazetari Lutfi Dervishi në lidhje me dhunën e ushtruar mbrëmjen e kaluar gjatë protestës së opozitës ndaj disa gazetarëve dhe operatorëve gjatë transmetimit live.
Duke e cilësuar si thjesht të neveritshme, vënien dorë ndaj gazetarëve, Dervishi thotë se: “Lajmësi nuk ka faj….”,– ndërkohë që thekson se pavarësishtë se gazetarët e terrenit janë më të munduarit dhe më të keqpaguarit ata janë njerëzit më të mirë që ka gazetaria, dhe se meritojnë mbështetje.
Reagimi i Gazetarit Lutfi Dervishi:
Lajmësi nuk ka faj….
Gazetarët, kameramanët dhe gjithë punonjësit e medias në terren – janë më të munduarit, më të keqpaguarit dhe njerëzit më të mirë që ka gazetaria (“profesioni më i mirë në botë”).
Jo vetëm duhen mbrojtur e mbështetur, por duhen ndihmuar se shpesh janë vetëm mes tri zjarresh: protestuesve, policisë dhe “politikave editoriale” të pronarëve!
Janë njerëz që punojnë me orar a pa orar, ditën dhe natën, në shi dhe nën gaz lotsjellës- janë më të rrezikuarit.
E imagjinoni një moment të vetëm se çfarë do të shikonit në ekran pa raportimet e tyre? Do të shikoni atë që shihni në netët “normale”- blla-blla- blla!
Nuk është thjesht krim, por e neveritshme të vësh dorë ndaj tyre!”
