Në një prononcim për gazetaren e Fax News Edona Haklaj, Artan Fuga është shprehur se gjendet përkrah gazetarëve me të gjitha forcat e mendjes dhe të shpirtit.
Sipas Fugës, këtë e bën për të inkurajuar gazetarët që pavarësisht se gjenden përballë keqtrajtimit fizik nga persona të veshur me pushtet, apo që ruajnë persona me pushtet, beson se “brezi i ri i gazetarëve do t’a kuptojë fort se është fjala për misionin e tyre dhe dinjitetin e tyre”.
“Ata që të kanë goditur ty, më kanë pështyrë edhe mua. Përkrah me të gjitha forcat e mendjes dhe të shpirtit gazetarët e të gjitha mediave, të cilët përtej ndonjë keqtrajtimi fizik nga individë që hiqen si të fortë dhe ushtrojnë dhunë mbi ta në sytë e autoriteteve të shtetit dhe ndonjë deputeteje që as i bën pershtypje kjo dhunë barabare, kane presion te jashtëzakonshëm dhe trajtohen si skllevër të medias, të penguar në ushtrimin e detyrës së tyre, dhe që ndihen të pavlerësuar, të pasigurt, të perbuzur shpesh herë, sepse asnjëri prej tyre nuk prodhon dot informacion të pavarur, nuk bën dot investigim, nuk komunikon dot drejtpërdrejt me audiencat.
Le të shpresojme që përtej sindikatave të burokratizuara, brezi i ri i gazetareëve do t’a kuptojë fort se është fjala për misionin e tyre dhe dinjitetin e tyre. Me këtë rast i shpreh gazetarit Renaldo Salianji ,studentit tim të super shkelqyer të gjithë solidaritetin tim. Ata që të kane rrahur ty me kane goditur edhe mua”, shprehet Fuga.
Reagimi i Fugës vjen pak kohë pas incidentit midis truprojes së kryeprokurores Arta Marku dhe gazetarit Renaldo Salianji. Ky I fundit po përpiqej ti merrte një prononcim Markut kur truproja e saj e largoi me dhunë duke e përplasur tek muri (lexo këtu).
Me kët rast, Komuniteti i Gazetarëve ka paralajmëruar edhe një protestë e cila vjen si një reagim i fortë ndaj dhunës që kërcënon gazetarët, heshtjes së institucuoneve përgjegjese. “Për të dënuar këto akte,kemi vendosur që ditën e Dielë ora 16:00-17:00 para Prokurorisë së Përgjithshme të protestojmë”, shkruhet në deklaratë e bërë publike për mediat (lexo këtu).
(F.GJ/FAXWEB.AL)
