Dhunoi gruan dhe avokatin, arrestohet në Fier 35-vjeçari i shpallur në kërkim

Një 35-vjeçar i shpallur në kërkim për dhunë në familje dhe goditje për shkak të detyrës, është arrestuar në Fier.

Në pranga është vënë Daniel Shkrela i cili ishte shpallur në kërkim pasi Gjykata e Shkallës së Parë të Juridiksionit të Përgjithshëm Fier, me vendimet e datave 23.09.2024 dhe 23.12.2024 ka caktuar masën e sigurisë “Arrest me burg”.

35-vjeçari ka ushtruar dhunë ndaj ish-bashkëshortes së tij si edhe ka goditur me sende të forta shtetasin 50 vjeç, me detyrë avokat.

NJOFTIMI I POLICISË:

Fier/Në zbatim të planit të masave për kontrollin e territorit, me qëllim goditjen e veprimtarive kriminale dhe kapjen e shtetasve në kërkim, u finalizua operacioni policor i koduar “Waiting”.

Si rezultat, u kap dhe u vu në pranga 1 shtetas (me precedent kriminal në fushën e krimeve kundër personit) i shpallur në kërkim për veprat penale “Dhuna në familje” dhe “Goditja për shkak të detyrës”.

Specialistët për Hetimin e Krimeve të Komisariatit të Policisë Fier, në bashkëpunim me Forcën e Posaçme “Shqiponja”, kanë kapur dhe ndaluar shtetasin Daniel Shkrela, 35 vjeç, banues në Fier, i cili ishte shpallur në kërkim pasi Gjykata e Shkallës së Parë të Juridiksionit të Përgjithshëm Fier, me vendimet e datave 23.09.2024 dhe 23.12.2024 ka caktuar masën e sigurisë “Arrest me burg”, për veprat penale“Dhuna në familje” dhe “Goditja për shkak të detyrës”.

Ky shtetas ka ushtruar dhunë ndaj ish-bashkëshortes së tij, shtetases N. Sh., si edhe ka goditur me sende të forta shtetasin E. S., 50 vjeç, me detyrë avokat.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.