Shërbimet e Komisariatit të Policisë Dibër, në bashkëpunim me Specialistët për Hetimin e Narkotikëve dhe Trafiqeve të DVP Dibër, kanë finalizuar me sukses operacionin policor të koduar “Përsëritësi”, që çoi në arrestimin e një shtetasi të dyshuar për vjedhje dhe posedim të lëndëve narkotike e municioneve luftarake.
Pas një njoftimi për vjedhjen e një çante që përmbante një shumë parash në euro dhe lekë, në pronësi të shtetasit M. B., policia organizoi punën hetimore dhe identifikoi autorin e dyshuar: S. B., 32 vjeç, banues në fshatin Laças, Dibër, person me precedentë penalë të mëparshëm për vjedhje.
Pas arrestimit të tij, u ushtrua kontroll në banesën e 32-vjeçarit, ku shërbimet e Policisë gjetën dhe sekuestruan në cilësinë e provës materiale:
- Një sasi lënde narkotike kanabis, e ndarë në doza gati për shitje;
- 270 fara kanabisi;
- 6 kubikë në të cilët ishin kultivuar fara kanabisi;
- Municion luftarak.
Operacioni është rezultat i inteligjencës policore dhe reagimit të shpejtë të strukturave hetimore, të cilat ndaluan një individ me rrezikshmëri të lartë shoqërore që vepronte përsëritshëm në fushën e krimeve kundër pasurisë dhe narkotikëve.
Materialet procedurale i janë referuar Prokurorisë pranë Gjykatës së Shkallës së Parë Dibër, për veprime të mëtejshme ligjore.
