Drejtoria Vendore e Policisë Dibër ka referuar një sërë materialesh procedurale në SPAK dhe Prokurorinë Dibër për vepra penale të ndryshme të lidhura me zgjedhjet dhe rendin publik.
Në Komisariatin e Policisë Mat, janë proceduar penalisht shtetasit E.D., 36 vjeç, administrator i Njësisë Administrative Xibër, dhe B.H., 57 vjeç, banues në Klos. Ata dyshohen për kryerjen e veprave penale “Korrupsioni aktiv në zgjedhje”, “Vetëgjyqësia” dhe “Pengimi i qarkullimit të mjeteve të transportit rrugor”. Materialet janë referuar në SPAK për hetim të mëtejshëm.
Po në Mat, shtetasi J.M., 27 vjeç, banues në Gurrë e Madhe, është proceduar për veprën penale “Mbajtja pa të drejtë e uniformës”, pasi kishte vendosur në mënyrë të paligjshme fenelina identike me ato të Policisë në automjetin e tij.
Ndërkohë në Bulqizë, punonjësi i Policisë Bashkiake, N.S., 52 vjeç, banues në Ostren, është proceduar për veprën penale “Dëmtime të tjera me dashje”, pasi dyshohet se ka goditur me grusht një shtetas tjetër, K.C., 43 vjeç nga Tirana. Ky i fundit po ashtu është proceduar për “Pengimin e qarkullimit të automjeteve”, pasi dyshohet se ka bllokuar lëvizjen e mjeteve në fshatin Radovesh.
Policia thekson se hetimet po vijojnë dhe do të veprohet me vendosmëri ndaj çdo shkeljeje që cënon rendin, sigurinë dhe ligjshmërinë gjatë procesit zgjedhor.
