Kati i pestë i një pallati te vjetër në qytetin e Pogradecit është djegur, ndërsa mësohet se ky është një kat shtesë ndërtuar nga ish kryebashkiakja e këtij qyteti para vitit 2000.
Zjarri ka zbritur deri në katin e katërt duke dëmtuar rëndë banesat. Ndërsa banorët aty raportojnë se ka patur edhe shpërthime bombolash gazi që e bënin të pamundur ndërhyrjen. Mësohet se zjarrëfiksja ka mbërritur me vonesë dhe e ka patur të vështirë të hyjë në zonë pasi rrugët janë të nguhta për shkak të ndërtimeve. Sapo kanë nisur flakët, banorët e pallatit janë larguar menjëherë jashtë për të shpëtuar.
Janë 6 familje të cilat tashmë kanë mbetur në qiell të hapur pas shkrumbimit të pallatit nga flakët. Nga bashkia e Pogradecit thuhet se është ofruar strehimi ndaj tyre, por familjet nuk kanë pranuar pasi do të strehohen tek të afërmit e tyre. Pritet që shtabi i emergjencave të nis punën për vlerësimin e dëmeve
Mësohet se të paktën 12 apartamente janë prekur nga zjarri ndërsa ende nuk ka një raport paraprak të dëmeve që janë shkaktuar dhe sa prej tyre i kanë shpëtuar shkatërrimit të plotë.
Ndërkohë, menjëherë ka nisur edhe evakuimi i banorëve. Një prej familjeve qe iu dogj banesa në Pogradec është strehuar nga bashkia në një hotel.
Ndërsa 5 familjet e tjera të cilët kanë ngelur tashmë pa banesë janë strehuar tek familjarët e tyre. Ata nuk kanë pranuar ndihmën që ju është ofruar për tu strehuar edhe pse kanë qenë në dispozicion 4 garzoniere.
Flakët tashmë janë shuar plotësisht dhe në këtë operacion kanë marrë pjesë zjarrfikëset e Korçës, Pogradecit, Maliqit dhe Prrenjasit.
(F.GJ/FAXWEB.AL)
Discussion about this post