Dikur mbante fjalime elektrizuese, kush është kandidatja e radhës në LSI që pranon mandatin (Video+foto)

Kur pritet që gjatë ditës së sotme katër kandidatë në listat e LSI-së të marrin mandatin nga KQZ, pasi kanë plotësuar formularin e dekriminalizimit, rrjedhjet në këtë forcë politike duket se nuk do të ndalin. Kështu mandatin e lënë nga Vangjel Tavo në Gjirokastër pritet që ta marrë Edjola Braha, pas negociatave të fshehta me Bledi Çuçin dhe Tërmet Peçin.

Derimë tani ajo mbante dhe postin e kryetares së LSI –së në Tepelenë, po duket se posti i deputetetes e ka joshur më së tepërmi. Ndërkohë në një video të mëposhtme Braha shfaqet mjaft entuziaste në kohën kur iu kërkonte qytetarëve votat për LSI-në.

E kontaktuar nga Fax News ajo nuk ka dashur që të japë një koment lidhur me vendimin që ka marrë.

Kush janë 4 LSI-stat që marrin sot mandatin në KQZ:

Aurora Mara ishte kandidate e LSI-së në Qarkun e Dibrës për zgjedhjet parlamentare të vitit 2017. Ajo ishte e dyta në listë pas ish-deputetit Përparim Spahiu, i cili ishte edhe udhëheqësi i Lëvizjes Socialiste për Integrim në Qarkun e Dibrës.

Aurora Mara prej disa vitesh ka mbajtur detyrën e përgjegjëses së sektorit në Ministrinë e Infrastrukturës, detyrë të cilën e ka ushtruar edhe pas zgjedhjeve parlamentare të vitit 2017.

Në listën e kandidatëve të LSIsë për Qarkun e Tiranës ishin dy persona që plotësuan formularin e dekriminalizmit, duke i hapur rrugë marrjes së mandatit të deputetit. I pari ishte Ylli Shehi, i cili u zgjodh deputet për herë të parë në vitin 2013 nën siglën e Partisë Republikane të udhëhequr nga Fatmir Mediu.

Por para zgjedhjeve vendore të vitit 2015, ai kaloi me LSI-në, gjë e cila krijoi besimin për ta rikandiduar edhe në zgjedhjet parlamentare të vitit 2017. Ai ishte i renditur i 8-ti në listën e LSIsë për Qarkun e Tiranës për vitin 2017 dhe tanimë pritet të bëhet deputet.

Kandidati tjetër nga LSI në Qarkun e Tiranës ishte Edmond Rrushaj, i cili ishte i pozicionuar i nënti në listën e kandidatëve të Lëvizjes Socialiste për Integrim për zgjedhjet parlamentare të vitit 2017.

Edmond Rrushaj ka mbajtur më përpara detyrën e drejtorit të QSUT-së.

Enver Roshi, kandidati tjetër, i cili do të marrë detyrën e deputetit nga radhët e LSI-së, ka mbajtur më parë detyrën e drejtorit të Institutit të Shëndetit Publik si edhe të dekanit në Fakultetin e Mjekësisë.

(E.K/FAXWEB.AL)