Ambasadorja e Kosovës në SHBA, Vlora Çitaku ka qenë e ftuara e presidentit të SHBA-së, për iftarin të cilin ai kishte shtruar.
Ajo postoi fotografi dhe video në rrjete sociale, në të cilën ka shkruar se i kishte folur Trumpit për Kosovën.
Çitaku gjithashtu tregon se i kishte treguar presidentit Trump, për nevojën e përfshirjes së SHBA-së në proceset të cilat po i kalon dhe mungesës akoma të rihapjes së dialogut me Serbinë.
Postimi i plotë:
Pata nderin dhe kënaqësinë e veçantë që në darkën e iftarit të shtruar në Shtëpinë e Bardhë të isha e ulur përkrah Presidentit të Shteteve të Bashkura të Amerikës, Z. Donald J. Trump.
Presidentit Trump i tregova se në shtetin tonë sekular, ka një kulturë tolerance dhe harmoni ndërmjet religjioneve.
Po ashtu, e njoftova në detaje mbi sfidat me të cilat ballafaqohemi aktualisht në Kosovë dhe biseduam mbi domosdoshmërinë e përfshirjes së drejtpërdrejtë të SHBA-ve në proceset e rëndësishme nëpër të cilat po kalon shteti ynë i ri.
Në darkë ishin të pranishëm zyrtarë të lartë të administratës Amerikane, Zv Presidenti Pence, Sekretari i Mbrojtjes Shanahan, Sekretari i Thesarit Mnuchin, Ambasadorë, etj.
(F.GJ/FAXWEB.AL)
Discussion about this post