Disa fshatra në Kukës prej 5 ditësh nën pushtetin e flakëve, rrezikohen edhe banesa

Vatra të tëra zjarri janë ndezur në pyjet e qarkut të Kukësit ku në disa fshatra flakët vijojnë të djegin sipërfaqe të tëra prej 5 ditësh.

Burime bëjnë me dije se në Has janë shfaqur disa vatra zjarri aktive që prej 5 ditësh ndërsa në Tropojë prej 2 ditësh.

Zjarri në Tropojë ka prekur fshatin  Geg -Hysen duke përfshirë një masiv gështenjash, ndërkohë që në zonën e Hasit është prekur fshati Gjinaj ku flakët prej 4 ditësh kanë djegur sipërfaqe të konsiderueshme pujore. Gazetari i Fax News Ermal Hallaçi njofton se në këtë fshat rrezikohen edhe disa banesa pasi të ndihmuara nga era e fortë zjarri po i afrohet banesave në fshatin Pusi i Thatë.

Ndërkohë, kryetari i Bashkisë Tropojë, ka njoftuar se rreth mesditës ka rënë një tjetër zjarr në gështenjat e fshatit Geghysen, por sipas tij, pasi është lajmëruar Bashkia janë marrë masa të menjëhershme në bashkëpunim me banorët, punonjës të bashkisë si dhe forcat e zjarrëfikëses për ta vendosur nën kontroll situatën.

“Nga të dhënat paraprake që kemi, janë djegur rreth 300 trungje gështenjash, por duhet theksuar se puna e madhe punonjësve, banorëve dhe zjarrëfikësve bëri të mundur që të shpëtonin pa u djegur disa banesa të këtij fshati”, ka deklaruar kryebashkiaku i Tropojës për Fax News.

(F.GJ/FAXWEB.AL)