“Disa personave u janë përsëritur testimet”, apelon Bino: Njerëzit të vetëkarantinohen, do shtojmë hartën e…

Shefja e Departamentit të Infektivit në Institutin e Shëndetit Publik, Silva Bino në një konferencë që dha sot nga ambientet e Minsitrisë së Shëndetësisë, u shpreh se në vendin tonë nuk ka asnjë rast pozitiv.

Bino u shpreh se janë kryer 58 testime , të cilat kanë rezultuar negative, ndërsa shtoi se është shumë e rëndësishme që në këtë periudhë, të vetëndërgjegjësohen.

Shefja e infektivit në ISHP tha se për disa persona që mund të ketë pasur dyshime të forta, janë kryer testime për herë të dytë dhe sërish kanë rezultuar negative.

Lidhur me përdorimin e maskave, Bino u shpreh se mbajtja e tyre iu rekomandohet vetëm personave që kanë pasur simptoma gripi, dhe sigurisht të gjithë ekipit mjekësor, që duhet të ketë kontakt direkt me pacientë të sëmurë.

“Personat që vijnë nga vendet e prekura duhet të vetëizolohen, dhe të kontaktojë në numrin 127 për të shuar çdo shqetësim që ata mund të kenë”, u shpreh Bino.

“Nuk ka asnjë rast me COVID 19, rastet që ne kemi testuar kanë pasur probleme me frymëmarrjen, si dhe kanë pasur histori udhëtimi, tashmë e kemi zgjeruar hartën, dhe për persona që kanë pasur probleme me frymëmarrjen, edhe pse nuk kanë pasur historik udhëtimi.

Ky testim do të nisë që prej ditës së sotme. 60% e rasteve të testuara kanë qenë nga Tirana, dhe rastet e tjera nga Durrësi, nga Vlora, nga Lushnja, dhe nga qytete të tjera”, u shpreh Bino.

“Dua ta ritheksoj edhe njëherë se të gjitha testet që kryen në ISHP  janë të certifikuara nga laboratoret më të mira, ka pasur raste që kemi marrë edhe nga dy mostra në pacientë të ndryshëm, dhe sërish kanë rezultuar negativ.

Janë identifikuar të dhëna se çfarë duhet të bëhet më tej me rastet, kemi përcaktuar dhe llojet e karantinës, që e para lidhet me persona të shëndetshëm, që mund ta bëjnë karantinën në kushte të shtëpisë, ka dhe karantina qeveritare, për ata persona që nuk i kanë kushtet e duhura.

Masat e higjenës janë shumë të rëndësishme, kemi nevojë për bashkëpunimin me qytetarët, për zbatimin e masave qeveritare. Është vënë re që sapuni e zhduk menjëherë virusin”, tha më tej Bino në fjalën e saj përpara gazetarëve.

(E.K/Faxweb.al)