Ministri i Mjedisit Blendi Klosi, me rastin e Ditës Botërore të Mjedisit, në një intervistë për Fax News, ka sqaruar aksionin e ministrisë për mbjelljen e pemëve, aksioni për pastrimin e territorit por edhe për përdorimin e qeseve plastike.
Klosi ka thënë se për mjedisin ekspertët, qytetarët dhe shoqëria kanë arritur të sensibilizohen.
Klosi ka thënë se nga 1 korriku ministria do i kërkojë biznesit të nxjerrë nga tregu qesen e hollë, që sipas ministrit është e pa biodegradueshme.
“Është e rëndësishme të flasim çdo ditë për mjedisin. Ne duhet të rregullojmë infrastrukturën. Bota ka arritur të kuptojë se përdorimi i qeseve plastike është problematikë e madhe për mjedisin. Janë materiale që dëmtojnë në mënyrë permanente mjedisin. Bota ka arritur t’a kuptojë, ne jemi në hapat e para. Nga 1 korriku, do u kërkojmë bizneseve të mos prodhojnë qesen e hollë të pa biodegradueshme por qese me shumë përdorim. Ose edhe taktikën e mamave tona me trasta”-është shprehur Klosi.
I pyetur nga gazetarja e Fax News, Eksiola Shehu, Klosi është ndalur edhe tek bashkëveprimi mes ekspertëve të mjedisit, aktivistëve dhe punonjësve të mjedisit.
Klosi ka thënë se këto grupe ka pika të shumta ku ndahen por qëllimi për të mbrojtur mjedisin ka sjellë një bashkëpunim të mirë.
“Jo sot po çdo ditë ka qenë e mbushur me një debat me njerëzit e mjedisit, shoqatat dhe aktivistët. Kritika i duhet bërë çdo ditë punonjësve të mjedisit. Nëpërmjet zërit të tyre erdhi sot një zgjidhje konkrete. P.sh mënyra si duhet të mbillen pemët, është involvuar në masë të madhe në të gjithë Shqipërinë, nga kryebashkiakët, nxënësit, biznesi, shoqëria ka kuptuar si duhet të trajtohen pemët. Moratoriumi ka dhënë efekte, por ekspertët kanë mendim kritik për këtë aksion, ç’lloj pemësh duhen mbjellë, të mbillen pemë për erozionin, pemë që ndihmojnë mjedisin. Debati është i madh dhe është i nevojshëm njësoj si antikorpet për trupin. “-ka thënë Klosi.
Klosi ka folur edhe për një nga problemet më aktuale në fushën e mjedisit, siç është çështja e trajtimit të mbetjeve urbane.
Klosi ka thënë se po përgatitet një strategji e cila do bëhet publike shumë shpejt.
“Ka shumë problematika, si mbetjet. Ne nuk prodhojmë mbetje të pamenaxhueshme. Kemi vështirësi brenda komunitetit tonë. Duhet të kuptojmë që s’kemi fabrika që sjellin ambalazhe. Jemi një vend i qetë por që kemi menaxhim të gabuar të mbetjeve urbane. Kemi punuar me ekspertizën më të mirë gjermane për të përgatitur një strategji, jemi në fazën përfundimtare. ”-ka thënë më tej ministri i Mjedisit, Blendi Klosi.
(F.G/Faxweb.al)
Discussion about this post