Besimtarët ortodoksë shqiptarë dhe në mbarë botën kremtojnë sot Shfaqjen e Perëndisë (Theofaninë), apo Pagëzimin e Krishtit, apo siç njihet dhe Dita e Ujit të Bekuar.
Kjo është një ndër të kremtet më të rëndësishme të kalendarit kishtar, Pagëzimin e Zotit Krisht dhe Ujin e Bekuar. Këtë ditë, sipas besimit të krishterë, kremtohet shfaqja e Perendisë së Trini dhe, me pagëzimin e Krishtit, shenjtërohet mbarë krijesa dhe të gjitha ujërat.
Këtë ditë, në katedralen “Ngjallja e Krishtit”, në Tiranë kryhet Liturgjia Hyjnore dhe më pas Shërbesa e Shenjtërimit të Madh të Ujit (ora 9:30-10:30) i cili merret nga besimtarët e shumtë për të ruajtur për të gjithë vitin dhe për të spërkatur me të shtëpitë e tyre.
Liturgjia Hyjnore dhe Shërbesa e shenjërimit të Ujit kryhet në të gjitha Mitropolitë e vendit dhe në vendet ku ka detëra e liqene, si në Durrës, Berat, Vlorë, Pogradec, Korçë, Sarandë etj. kryhet procesion madhështor ku hidhet kryqi i shenjtë në ujërat dhe djemtë hidhen për ta kapur. Besimtarët ortodoksë kremtojnë Ditën e Ujit të Bekuar në Durrës, Korçë e Pogradec
Shërbesa fillon me këndimin e himneve të veçanta dhe me temjanisjen e ujit, që është vendosur në mes të kishës.
Kur këndohet përlëshorja e festës, kremtuesi zhyt kryqin në ujë tri herë dhe pastaj vazhdon, duke spërkatur me ujin në katër drejtimet e horizontit. Pastaj, ai bekon popullin dhe shtëpitë e tyre me ujin e shenjtëruar, i cili qëndron për shpëtimin e gjithë njerëzve dhe gjithë krijimit, të cilin Krishti e ka prekur nëpërmjet “epifanisë” së tij në mish, për jetën e Botës.
Discussion about this post