Ambasadorja amerikane Yuri Kim, ka mbajtur fjalën e saj në takimin e organizuar nga qeveria shqiptare me një grup kompanish, në tregun e energjisë në SHBA dhe BE, për të diskutuar në lidhje me planet për diversifikimin e burimeve.
Yuri Kim tha se lufta në Ukrainë e bëri emergjente ndërhyrjen në tregun e energjisë, për të shmangur varësinë e Europës dhe të gjithë botës nga gazi rus.
“Faleminderit të gjithëve ju që keni udhëtuar nga larg, SHBA ka vendosur theksin në diversifikimin e burimeve të energjisë, të gjithë kemi parë që pushtimi i paprovokuar i Ukrainës ka kërcënuar furnizimin me energji.
Rusia ka ndaluar furnizimin me gaz të Polonisë dhe Bullgarisë, shpresoj që diskutimet e sotme të prodhojnë projekte të prekshme. Siguria energjitike ka qenë e lidhur ngushtë me sigurinë kombëtare, ne shohim fatura të larta, njerëz që përpiqen të paguajnë, rajoni duhet të kërkojë zgjidhje krijuese së bashku, për të gjetur zgjidhje për sigurinë energjitike dhe të mjedisit.
Kjo është arsyeja se pse u ndërtua TAP, dhe tashmë po sjell gaz në Europë, kjo është dhe arsyeja se pse SHBA është në partneritet me Shqipërinë. Jam e emocionuar që shoh kaq shumë njerëz nga qeveritë e rajonit, dhe sektorit privat, që janë mbledhur së bashku këtu për të gjetur një zgjidhje”,u shpreh Kim gjatë fjalës së saj.
