Syrja Zotaj dhe bashkëshortja e tij, shprehen se tashmë kanë 6 fëmijë, pasi Ervisin e kanë bërë ‘hasha’.
Me lot në sy dhe plot dhembje ata shprehen se djalin e tyre duan të shohin të vdekur, pasi akuzohet se ka marrë pjesë në dhunimin dhe më pas hedhjen në rezervuar të Drita Saliajt, ngjarje kjo e ndodhur 5 ditë më parë në fshatin Gjerbës të Mallakastrës.
Të dy prindërit kërkojnë dënim maksimal për të birin e tyre, ndërsa thonë se për të paktën 3 ditë, djalin e kanë parë të shqetësuar, dhe të kishte një sjellje të ashpër.
Ndërkohë që familja Zotaj shprehet me fjalët më të mira për viktimën, me të cilin kishin marrëdhënie mjaft miqësore, teksa thonë se ishte një nënë e vuajtur që përpiqej të bënte më të mirën për familjen e saj.
“I lutem shtetit që të marrë masat më të ashpra, ose të sjellë në Gjerbës ta vrasë me duart e mija. Policia ka ardhur te shtëpia dhe na ka gjetur në gjumë, më pyetën për djalin, dhe ju thashë që nuk e dija. ‘’Gjejeni dhe merren”, u thashë, çuni kishte vajtur për të fjetur te shtëpia e një kushëririt tim që rri në Greqi”, tregon babai i Ervisit.
Ndërkohë e ëma tregon: Ishte si i tërbuar, bukën nuk ma hante, dua që ta malaksni me benzinë dhe të ma digjni. Ne jemi rritur me të, ishte grua shumë e mirë, e kam uruar për vitin e ri. Nuk e dua më djalin pasi ka bërë atë veprim, dua të ma pushkatoni në vend.
Kam marrë dhe vajzën në telefon dhe i kam thënë që Visi nuk është mirë, në datën 10 erdhi nga Greqia, se punonte andej. Luisin e njohim, kemi pasur marrëdhënie të mira dhe me ta. Për ne janë njerëz shumë të lartë shumë të mirë.
Ndërkohë që prindërit e thonë qartë se djalit nuk do ti gjejnë avokat, dhe nuk do ti japin asnjë mbështetje.
“Unë dua të pushkatohet në Gjerbës, nuk e dua, e kemi rritur me lakra, jemi këputur, i kemi duart për ibret, i lutem qeverisë të ma bjenë dhe ta vrasë me dorën time. Kemi katër djem dhe 3 vajza, tani kam 6, e kam bërë hasha. Të ma sjellin tani këtu, dhe po nuk e vrava, jam burrë i pander. Ai më ka borxh mua kokën, do i them atij zotërisë që të më vrasë mua. Kaq jemi bërë, që të më vrasë ai mua dhe të mbyllet”, shprehet Syrja Zotaj.
Nga ana tjetër të pyetur nga gazetarët nëse i frikësohen një hakmarrje nga familja e Drita Saliajt, çifti Zotaj shprehet se nuk kanë marrë ndonjë kërcënim, ndërsa shtojnë se nuk i kanë lejuar që të marrin pjesë në varrimin e të ndjerës.
“Unë i shkoj atje vetë që të më vrasë, më tutje nuk di unë se nuk kam shkollë”, përfundon Syrja Zotaj.
Për të tre të rinjtë e përfshirë në vrasjen e Drita Saliajt, Gjykata ka dhënë masën e sigurisë ‘’burg pa afat”.
(E.K/Faxweb.al)
