Prokuroria e Përgjithshme ka nisur hetimet në lidhje me ekstradimin e Nazer Seitit në drejtim të Italisë.
Pas dyshimeve dhe pikëpyetjeve të ngritura për ekstradimin, mësohet se do të kryhen verifikime në Prokurorinë e Tiranës, të Krimeve të Rënda, në Ministrinë e Drejtësisë dhe Drejtorinë e Burgjeve.
Hetimet do të përfshijnë edhe ministren Gjonaj. Nuk dihet se pse prokuroria nuk reagoi më herët rreth çështjes.
Pikëpyetjet e ngritura më herët:
Vendimi për ekstradimin e Nazer Seitin drejt Italisë ditën e djeshme ka ngritur mjaft pikëpyetje. Kjo për shkak se në disa pika është shkelur Kodi i Procedurës penale.
Pavarësisht se vetë i dyshuari si ‘financier’ i Habiljave e kishte kërkuar ekstradimin, drejtësia nuk mund të luajë me tekat e njerëzve.
Dy gjykata, ajo e Krimeve dhe ajo e Tiranës, ndonëse fare pranë njëra-tjetrës nuk e kane patur informacionin e duhur se ç’po ndodhte, pavarësisht se Kodi i Procedurës Penale është mëse i qartë në rastin e ekstradimeve.
Pas ndryshimeve ligjore të hyra në fuqi në gusht 2017, dispozita e ekstradimit nuk lë vend për interpretime. Në nenin 491 thuhet se nuk mund të lejohet ekstradimi kur ka filluar hetimi në Shqipëri, edhe nëse vepra është kryer jashtë vendit.
Siç flasin faktet, pavarësisht hetimit në Katania ndalimi i Nezar Seitit ndodhi pikërisht për shkak të procedimit në Tiranë, ku ai nuk ishte i vetmi i hetuar në këtë dosje.
Por për mungesë të materialeve nga Italia, Krimet e Rënda vendosën fillimisht 20 ditë arrest me burg e më pas më 22 nëntor, Apeli i dha formë të prerë me arrest me burg, që do të thotë se pas këtij vendimi, asnjë gjykatë dhe askush nuk mund të pranonte ekstradimin e këtij shtetasi.
E megjithatë Gjykata e Tiranës shpalli ekstradimin e vlonjatit. Nëse do të lexohej ligji, gjykata e kryeqytetit duhet të kryente verifikimet nëse ndaj këtij shtetasi ishte shpallur, apo jo masë sigurie brenda vendit.
Ky është një nga kushtet ndalues në Kodin e Procedurës Penale. Shkelja e dytë e gjykatës është fakti që për këtë shtetas masa është vendosur për të njëjtën vepër penale, që e dyshon edhe Italia.
Në këtë rast, përderisa të dyja vendet kanë marrëveshje sipas konventës mbi ekstradimin, duhet të kishte përparësi zbatimi i ligjit vendas në favor të shtetasit të vet.
Por, edhe kjo shkelje ka kaluar në heshtje dhe nuk është inspektuar as nga Këshilli i Lartë i Drejtësisë, ka një autoritet përfundimtar që jep firmën e fundit dhe që është ministri i Drejtësisë.
Sërish siç thotë ligji, përpara se të pranonte, ministrja Etilda Gjonaj duhet të verifikonte nëse ekzsitonin apo jo kushtet për të pranuar ekstradimin.
