Djegia e flamurit shqiptar në Athinë, Ministria e Jashtme thërret sërish ambasadoren greke Eleni Surani

Vrasja e 35-vjeçarit gjatë shkëmbimit të zjarrit me forcat RENEA, ka sjellë një sërë reagimesh si në Shqipëri ashtu edhe në shtetin helen.

Një grup qytetarësh grekë prej ditësh kanë protestuar kundër vrasjes së Kostantinos Katsifas, ndërsa mbrëmjen e djeshme në protestat e zhvilluara në sheshin “Sintagma” të Athinës u dogj edhe flamuri shqiptar.

Lidhur me këtë, Ministria e Punëve të Jashtme të Shqipërisë ka thirrur sërish ambasadoren greke në Tiranë Eleni Surani. MEPJ i ka kërkuar asaj të distancohet nga këto ngjarje, si dhe i ka kërkuar që Greqia të sigurojë jetën dhe pronën e qytetarëve shqiptarë në Greqi.

Kujtojmë se ditën e dielë, pas vrasjes së Kostantinos Katsifas, u protestua me thirrje antishqiptare edhe para ambasadës sonë në Athinë.

Njoftimi i plotë i MEPJ:

Ambasadorja e Greqisë në Shqipëri, Eleni Surani u thirr sot në Ministrinë për Evropën dhe Punët e Jashtme, në lidhje me ngjarjet e ndodhura në Greqi, duke nisur nga alarmi për bombë pranë Ambasadës tonë në Athinë, djegia e bizneseve shqiptarë, protesta para ambasadës dhe konsullatës tonë si dhe djegia e flamurit kombëtar.

Ambasadores iu kërkua distancimi dhe në të njëjtën kohë, dënimi nga ana e autoriteteve greke ndaj këtyre akteve të rënda që cenojnë klimën e marrëdhënieve miqësore mes fqinjëve.

MEPJ nënvizoi gjithashtu nevojën që autoritetet greke të marrin masat e duhura për të garantuar jetën dhe pronën e shtetasve shqiptarë me banim në Greqi.

(B.B/ Faxweb.al)