Kryeministri Edi Rama ka reaguar pas vendimit të deputetëve të opozitës së bashkuar për të djegur mandatet parlamentare.
Në një postim në rrjetet sociale kryeministri ka paralajmëruar një konferencë për shtyp.
“Në 18.45 do t’u drejtohem qytetarëve në një komunikim të drejtëpërdrejtë. Faleminderit paraprakisht të gjithë atyre që do ta ndjekinKush s’do mundet dhe dëshiron ta ndjekë, do ta ketë të plotë në ERTV.”– shkruan Rama.
Pas protestës së zhvilluar ditën e sotme para parlamentit, dy liderët kryesore të opozitës Lulzim Basha dhe Monika Kryemadhi u drejtuan së bashku me deputetët, drejt kryesisë së Kuvendit për të dorëzuar zyrtarisht formularin e dorëheqjes.
Ndërkohë kreu i PD-së Lulzim Basha, lajmëroi në përfundim të protestës se revolta e opozitës nuk do të ndalet deri sa të shembet kjo qeveri.
Kujtojmë se kryetari i Grupit Parlamentar të Partisë Socialiste, Taulant Balla u shpreh se mandatet që PD dhe LSI paraqitën dorëheqjet nuk janë personale, as të partive respektive, por janë shprehje e vullnetit të popullit.
“Dorëzimi i dorëheqjeve prej shumë prej deputetëve të këtyre dy partive përbën një tradhëti për të gjithë ata qindra mijëra qytetarë që besuan tek platforma e opozitës në qershor 2017. Kjo sjellje e paprecedentë e PD dhe LSI sot ngjason gjithmonë e më shumë me një sjellje tipike të një organizate terroriste, e gatshme për të hedhur në erë të gjithë sistemin.”- shprehej Balla.(Lexo këtu)
(M.Q/Faxweb.al)
