Banorët e Elbasanit ankohen për tmerrin që po përjetojnë nga djegia e plehrave të inceneratorit. Madje kjo për ta është kthyer në një situtatë shqetësuese psi nuk po qëndrojnë dot në banesat e tyre nga era e keqe.
Për “Nisma Thurrje” ata kanë treguar se edhe pse janë ankuar për ata nuk ka pasur asnjë reagim nga shteti.
“Keq fare është është era sidomos në darkë kur edhe bie vesa ose kur bie shi vjen shumë erë. Vjen erë e keqe dhe nuk rrihet. Është shfaqur edhe një mizë e re që të pickon, e cila ka helm të keq. Në darkë i mbajmë dritaret mbyllur. Po jemi ankuar por asnjë gjë nuk bëjnë . Ajo makineria është 24 orë ndezur, por në darkë lëshojnë atë ajërin e keq. Po kështu edhe pemët janë tharë nga tymi”, shprehet një banor i zonës.
Ndërsa një tjetër thekson se era ndihet shumë dhe edhe pse janë ankuar askush nuk është interesuar për ta. “Ndihet shumë. Jemi ankuar. Por kush na pyet neve edhe pse jemi ankuar”, shprehet ai.
Sjellim në vëmendje që projekti është një nga 3 koncesionet e fituara nga një kompani e cila deri në vitin 2014 ka ofruar shërbime IT dhe papritur fiton të drejtën për të djegur plehrat në të gjithë vendin. Pritet që një incenerator të hapet në Fier dhe një tjetër në Tiranë. (J.V/Shuplaka)
Discussion about this post