Veprimi i guximshëm, deri në vetëflijim, i djalit të pronarit të resortit që shpërtheu në flakë në Velipojë për të shpëtuar babain e tij, ka ngacmuar vëmendjen e babait të këngëtarit të ndjerë Ergi Dini, I cili humbi jetën në një aksident me motor.
Dashamir Dini shkruan se djem të tillë si Hektori janë të padukshëm, të mirë, të thjeshtë ashtu si shpirti shqiptar. Ai e quan Hektor Zenunin, që akoma ndodhet në gjendje të rëndë për shkak të djegjes në masë të madhë, më shumë se hero.
SHKRIMI I PLOTË:
‘Ah, djemtë tanë!
Kushtuar djalit të mrekullueshëm Hektor Zenuni
Ah, djemtë tanë! Krenaria, por jo rrallë edhe turpi i baballarëve.
Na dëshpërojnë kronikat e zeza të TV-ve, kur shohim se djali vret prindërit, se një tjetër vret nënën, se një i tretë merr pistoletën dhe qëllon mbi të ëmën e vret pa mëshirë babain…E kështu me radhë.
Dhe dëshperimi u shtohet halleve të tjera, e na bën të mbytemi në mosbesim për të ardhmen, në mosbesim për “brezin që po rritet”…
Por Hektor Zenuni, biri i pronarit fatkeq që humbi jetën në incidentin e Restorant “Kavaljeros” në plazhin e Velipojës në Shkodër, para pak ditësh, thotë:”Jo! Nuk është ashtu!”.
Ai sulet përmes flakëve që kishin përfshirë lokalin, për të shpëtuar të atin, i vetëdijshëm se po hynte në gojën e vdekjes së sigurtë edhe vete, duke i ofruar fatit jetën e vet, për atë të babait.
A duhet ta quaj hero? Jo!
Është shumë më shumë,
Është Modeli i një Djali të Mrekullueshëm, që ne të gjithë e ëndërrojmë dhe përpiqemi ta krijojmë tek djemtë tanë, me shembullin më të zgjedhur nga vetja dhe dashurinë pa fund.
Nuk e kam njohur asnjëherë më parë këtë djalë simpatik, me trup atleti dhe fytyrë njerëzore.
Sepse djemtë e mirë të tillë janë. Të thjeshtë dhe të padukshëm, siç është vetë shpirti i mirë shqiptar.
Një djalë të tille kisha edhe unë. Një djalë të tillë ke edhe ti…edhe ti…edhe ti….’ Shkruan bababi i këngëtarit të ndjerë Ergi Dini
(B.H/Shuplaka)
Discussion about this post