Ish-presidenti, Bujar Nishani ka reaguar pas dhunës dhe shoqërimit që Policia i bëri Sekretarit Organizativ të PD-së, Sait Dollapi, vendndodhja e të cilit nuk bëhet ende e ditur.
Në reagimin e tij në rrjetet sociale, Nishani thotë se aktet e torturës ndaj opozitës, janë të paprecedenta dhe bëhen nga segmente të krimit në Policinë e Shtetit.
“Pas 28 vitesh në Shqipëri segmente të inkriminuara, të rekrutuara vitet e fundit në Policinë e Shtetit rikthyen aktet e torturës, në sheshe publike kundër eksponentëve të opozitës politike.
Edi Rama, Sandër Lleshi dhe drejtuesi policor i aktit të torturës mbi Sekretarin Organizativ të Partisë Demokratike kanë llogarinë e hapur më të madhe me ligjin dhe popullin opozitar.
Tortura publike nuk ka asnjë proporcionalitet dhe nuk do mund të harrohet për asnjë çmim”, thekson Nishani.
