Ditën e djeshme forca të shumta të policisë dhe punonjës të IKMT-së zbarkuan në orën 6 të mëngjesit në zonën e Astirit për të shembur banesat.
Rezistenca e gjatë e banorëve u mposht dje nga forcat e shumta të policisë, ndërkohë që shumë prej banorëve përfunduan në spital dhe pjesa tjetër në rajonin e policisë.
Por në mbështetje të banorëve, prej një kohë të gjatë dhe ndër më protagonistët, ka qenë ish-deputeti i Partisë Demokratike, Klevis Balliu, i cili dje u duk në zonë pas rrafshimit të banesave.
Madje pak kohë më parë në një intervistë për Fax News, në emisionin “Natë me Xhaxhiun” ish deputeti shprehej me shumë siguri se do t’i mbronte banesat e qytetarëve me trupin e tij.
“Nuk i shemb dot ato shtëpia ti se nuk do t’i shtypësh me fadroma banorët. Përpara se të shtypësh banorët do të duhet të kalosh para trupave të grupit parlamentar të PD. Ditën që ai do t’i sjellë fadromat do t’i ketë rrjesht aty para. E kemi thënë se jemi aty për të mbrojtur banorët se janë për kaozë legjitime që i mbrone dhe ligji dhe Kushtetuta. Kushtetutën nuk e shkel as Edi Rama dhe as Erion Veliaj. Dhe për ta mbrojtur atë ne do të jemi në vijë të parë.”- shprehej Balliu.
Por i pyetur dje nga gazetarët, se pse nuk ka qenë opozita në orët e para të mëngjesit në Astir, Balliu u shpreh:
“Unë e kuptoj atë të banorëve, po këta kanë qenë këtu që para nesh, në orën e gjashtë e pak minuta ka qenë Edmond Spaho këtu, ne nuk jemi ushtarë, ne kemi ardhur për të denoncuar. Kjo zgjidhet duke u bashkuar të gjithë, le të dalë Edi Rama përballë nesh, jo policët”.- u shpreh Balliu.
(M.Q/Faxweb.al)
