Spartak Ngjela ishte i ftuar në studion e lajmeve të Fax News ku foli për situatën e krijuar në Unazën e Re, emërimet në Kushtetuese, reformën në drejtësi, mini-shengenin ballkanik por edhe për çështje të tjera që janë bërë tema diskutimi së fundmi në vend.
Ngjela tha se përplasja në Astori është pasojë e korrupsionit, ndërsa kritikat ndaj opozitës që janë bërë me argumentin se ka braktisur banorët, avokati nuk i komentoi gjatë por tha se ngritja e institucioneve të reja të drejtësisë, do ti japë fund kësaj situate.
Ngjela foli po ashtu edhe për emërimet në Gjykatën Kushtetuese, duke i quajtur pozitive dhe kritikat ndaj dy anëtareve të reja të votuara në Kuvend, i justifikoi duke thënë se ishte rast emergjence të mirëkuptuar nga ndërkombëtarët.
Sipas avokatit, Reformën në Drejtësi e kanë në dorë amerikanët dhe shtjelloi se të gjithë zyrtarët dhe ish-zyrtarët e lartë, përfshirë edhe atë vetë do të kalojnë në sitë.
Pjesë nga intervista me gazetarin Enea Meksi:
Opozita kishte deklaruar se do të qëndronte në krah të banorëve në çdo formë, ndërsa sot u kritikua nga protestuesit, si e komentoni?
Ngjela: Ajo opozitë nuk ka lidhje me popullin dhe interesin e shqiptarëve. Ata mendojnë se mund të krijojnë destabilizimin e Shqipërisë por kjo nuk lejohet se janë forcat ndërkombëtare që e ruajnë. Pa ligj qeveria nuk jep dot para, ka marrë fund, ky është shteti. A mund ta bëjnë ligjin, le ta bëjnë. Pasi të kenë mbrojtje ligjore le të paguhet. Tirana nuk rregullohet nëse nuk prishen ndërtimet pa leje. Do vijë ajo kohë, por do paguhen rreth 500 milionë euro.
Basha ka thënë se do i dëmshpërblejë pronat pasi të vijë në pushtet, mendoni se ky është një zotim që mund ta mbajë?
Ngjela: Po ç’Lulzim Bashë, mos mendoni se këta mbrojnë njerëzit, i ka kapur reforma anti-korrupsion. Kanë blerë dy prokuror dhe nuk kanë blerë dot të tretin. Janë të gjithë subjekt i Prokurorisë së Posaçme dhe kur të ndërtohet ajo më pyesni mua. Por nuk është faji i njerëzve të thjeshtë që vuajnë pasojat. Sot këta prisnin, edhe Rama të jeni të bindur, destabilizim.
Dje Kuvendi ka miratuar 2 kandidaturat, ndërsa Presidenti i ka konsideruar anti ligjore dhe në shkelje të Kushtetutës, ju si i argumentoni?
Ngjela: Çfarë do pezullojë Presidenti, këta u zgjodhën. Ju lutem, ka një monitorim ndërkombëtar Shqipëria. Menjëherë pasi u zgjodhën doli ambasada amerikane dhe i përshëndeti. Të tjerat janë broçkulla presidenti nuk ka forcë. Rama kërkon të krijojë turbullira të shpëtojë Bashën, mund të jetë edhe rastësi që në kohën kur sulmohet Basha del Rama krijon një përplasje sociale. Me lindjen e Prokurorisë së Posaçme nuk ka asnjë punë askush tjetër për çështjen e Bashës, ndërsa këtë nuk e ndalon asnjë përplasje sociale. Prokuroria e Posçme fillon hetimin dhe nuk ka lidhje fare me këtë, ajo ka lidhje me ndërkombëtarët.
Dy takimet e Minishengenit Ballkanik, Kosova u vetëpërshjashtua nga ky proces tha Rama, ju si e analizoni?
Ngjela: Si mund të shkojë ai në një shtet që nuk e njeh pavarësinë. Jo mos-pranimi, por pranimi është kusht. Pse nuk shkoi Kosova, nuk e lejoi politika amerikane. Kosova rrezikonte po të shkonte atje. Do të ketë qëndrim ndaj Ramës jam i bindur në lidhje me Kosovën.
Takimi ishte për të sulmuar sovranitetin e Kosovës, por nuk mundin dot se atje ka ardhur Albin Kurti, një lëvizje patriotike. ‘Jo’ e BE-së për negociatat është votë kundër interesit amerikan në Ballkanin Perëndimor, e kam thënë unë dhe këtë e ka thënë edhe Amerika pas meje. E shikoni Makronin si sillet vërdallë, se ai e bëri për interesat e tij.
Kur thoni se shumë emra drejtuesish dhe ish-drejtuesish shtetërorë do të kalojnë në sitë kush janë këta?
Ngjela: Në sitë do të shkojnë të gjithë, se kë kap është punë tjetër. Çdo ministër do të shkojë në sitë. Çdo njeri që ka pasur pozitë të lartë shtetërore do ti nënshtrohet hetimit, përfshirë edhe unë se kam qenë ministër. Duhet të provojnë se paratë që kanë janë të tyret. Kë do kapi rrjeta… që do kapi shumë rrjeta atë e dinë edhe pulat, se ato pallatet që janë ndërtuar etj, por nuk janë të gjithë kështu. Deri më tani mund të kishim dyshime, këtë herë politika amerikane ka deklaruar se Reformën në Drejtësi në Shqipëri e drejtojmë ne. Është arbitër ndërkombëtar. Shqiptarët nuk e besojnë se këta do të vënë dorë tek pronat e vjedhura të tyre por unë i garantoj shqiptarët që këta do ti marrin pronat e vjedhura të tyre. Ata që ngelen në rrjetë do ti nënshtrohen procesit penal.
Dy anëtarët e reja të kushtetueses u kritikuan pasi kishin ngelur në provimin e magjistraturës ndërsa kjo nuk u mor parasysh, mendoni se votimi në Kuvend ishte i ligjshëm?
Ngjela: Kjo është bërë në kushte emergjence, kjo quhet nevojë ekstreme. Mund të ketë defekte të vogla dhe gabime të vogla. Edhe ndërkombëtarët e kanë kuptuar këtë gjë dhe ndaj e kanë toleruar.
(F.GJ/FAXWEB.AL)
Discussion about this post